Domingu XXXII Tempu Komún – Tinan A

Domingu XXXII Tempu Komún – Tinan A

Liturjia Domingu XXXII Tempu Komún nian konvida ita ba vijilánsia. Liturjia fó hanoin atu ita matan moris nafatin ba Na’i ne’ebé mai hikas no prepara fuan atu simu Nia.

Iha leitura daruak, Paulo garante sarani sira Tessalónica nian katak Kristu sei mai fali atu taka istória umana no inaugura realidade mundu definitivu; ema hotu ne’ebé adere ba Jezús no identifika an ho Nia sei bá hasoru Na’i no horik ho Nia ba nafatin.

Evanjellu fó hanoin katak “prepara an” atu simu Na’i ne’ebé mai signifika moris iha fidelidade ba Jezús nia hanorin sira no kompromete an ba valór sira Reinu nian, loron ba loron. Ho ezemplu feto virjen “beik-teen” na’in lima ne’ebé la lori mina atu mantein ahi-oan lakan enkuantu hein noivu, fó atensaun mai ita katak valór Evanjellu nian de’it mak asegura partisipasaun iha festa Reinu nian.

Leitura dahuluk aprezenta mai ita “sabedouria”, don gratuitu no inkondisionál Maromak nian ba ema. Ne’e mak kazu paradigmátiku ida kona-ba oinsá Maromak preokupa ho ema nia ksolok no tau ba nia oan sira nia dispozisaun bee-matan ne’ebé hasuli vida definitiva. Ema presiza de’it matan moris, vijilante no disponivel atu simu, iha momentu hotu, moris no salvasaun ne’ebé Maromak oferese.

Download