Iha Domingu XXXIV Tempu Komún nian, ita selebra Solenidade Na’i Jezús Kristu, Liurai Lalehan no Rai nian. Leitura sira domingu ne’e nian ko’alia mai ita ona-ba Maromak nia Reinu (Reinu ne’ebé Jezús mak liurai). Reinu ne’e mak realidade ida ne’ebé Jezús kuda, dixípulu sira simu bolun atu harii iha istória (liuhusi domin) no sei iha nia tempu definitivu iha mundu ne’ebé sei mai.

Leitura dahuluk utiliza imajen Bibi-Atan Di’ak nian  atu aprezenta Maromak no define ninia relasaun ho ema sira. Imajen subliña, husi parte ida, Maromak nia autoridade no Ninia papél iha kondusaun ema nian iha dalan sira istória nian; no husi parte seluk, subliña Maromak nia preokupasaun, kariñu, kuidadu, domin ba nia Povu.

Evanjellu aprezenta mai ita kuadru dramátiku ida, “liurai” Jezús ne’ebé interpela ninia dixípulu sira kona-ba domin ne’ebé partilla ho maun no biin-alin sira, liuliu sira ne’ebé kiak, fraku, la iha protesaun. Kestaun mak ne’e: egoízmu, taka iha an rasik, indiferensa ba maluk ne’ebé terus, la hetan fatin iha Maromak nia Reinu. Ema ne’ebé insiste atu lori nia moris tuir kritériu sira-ne’e sei hela iha Reinu nia ninin.

Iha leitura daruak, Paulo fó hanoin ba sarani sira, katak ema fiar-na’in nia dalan nia rohan mak partisipasaun iha “Maromak nia Reinu” moris nakonu nian, iha ne’ebé Kristu lori ita bá. Iha Reinu definitivu ne’e, Maromak sei hatudu an iha buat hotu no sei atua nu’udar sasán hotu nia Na’i (vers. 28).

Download