Maromak hakarak hato’o buat ruma mai ita-nia Inspetoria

Maromak hakarak hato’o buat ruma mai ita-nia Inspetoria

Irmán doben sira,

Molok ba Jakarta, dala ida tan ha’u hakarak hato’o ba imi hotu ha’u-nia kumprimentus sira.

Aban sei hahú Novena ba Maria Auxiliadora no bainrua Novena ba Natál, ha’u husu ba imi atu kontinua entrega ita-nia Irmán moras sira (ne’ebé sai barak liután, maski balun moras la todan, maibé moras mak buat ruma ne’ebé “atrapalha” ita-nia moris nafatin) ba Na’i-Feto no Kosok-Oan ne’ebé hiit An mai.

Liuhusi akontesimentu sira ne’e, ha’u hanoin katak Maromak hakarak hato’o buat ruma mai ita-nia Inspetoria, buat hotu ne’e tama iha ninia planu salvasaun nian, maski seidauk klaru mai ita. Ha’u konvida atu ida-idak bele husu mai ninia an: buat ne’e interpela ha’u oinsá?

Keta karik Maromak hakarak katak ita sai fiél liután ba ita-nia Konstituisaun no Regulamentu, ba artigu ida-idak, atu ita-nia moris bele sai radikál no sasin kona-ba Jezús nu’udar “rikusoin úniku” iha ita-nia moris.

Keta karik husu mai ita ida-idak atu hasai ita-nia an husi sentru no hatún ita-nia ezijénsia no presiza pesoál hodi fó atensaun liu ba ita-nia Irmán sira ho sira-nia ezijénsia no sira-nia presiza.

Keta karik husu mai ita ida-idak atu haboot ita-nia domin ba malu hodi husik komentáriu no “gossip” sira ne’ebé halo ita hateke ba ita-nia irmán sira ho matan negativu.

Keta karik husu mai ita ida-idak atu iha laran manas liután ba ita-nia misaun, liuliu ba sira ne’ebé ki’ik no kiak.

Ha’u hanoin katak, iha prezépiu nia oin ho sinseridade, ida-idak bele rona Kosok Oan Jezús nia liafuan no foti dezisaun ruma ne’ebé, maski husu ita-nia sakrifísiu, haboot ita-nia domin ba Nia no ba maluk sira.

Ho hanoin sira ne’e ha’u hato’o Boas Festas de Natal no Feliz entrada: ha’u sei lori imi-nia kumprimentus, hako’ak, bejiñus (ida-idak hili buat ne’ebé gosta!!) ba Madre Jerál, ba Ir. Paola, no ba Irmán Timor-oan no Indonézia sira.

Boas festas!

Ir. Alma Castagna