Jezús moris hi’as duni? Oinsá mak ita bele halo esperiénsia ida enkontru nian ho Jezús moris hi’as? Oinsá ita bele hatudu ba mundu katak Jezús moris no kontinua oferese ba ema salvasaun? Ba kestaun sira-ne’e mak liturjia Domingu III Páskua nian buka hatán.

Evanjellu asegura mai ita katak Jezús moris no kontinua sai sentru atu hodi harii komunidade eskolante sira-nian. Iha enkontru komunitáriu, iha diálogu nu’udar maun no biin-alin sira-nian ne’ebé partilla fiar hanesan, rona Maromak nia Liafuan, domin hatudu ho jestu fraternidade no servisu nian – mak eskolante sira bele halo esperiénsia enkontru nian ho Jezús moris-hi’as. Hasoru tiha Jezús, eskolante sira simu konvite atu fó sasin iha ema sira nia oin.

Leitura dahuluk aprezenta mai ita eskolante sira nia sasin kona-ba Jezús. Hatudu tiha ho jestu konkretu katak Jezús moris no kontinua oferese salvasaun, Pedro no João konvida interlokutór sira atu simu proposta moris nian ne’ebé Jezús halo ba sira.

Leitura daruak fó hanoin katak ema sarani, hasoru tiha Jezús no aseita moris ne’ebé Nia oferese, tenke moris ho forma koerente ho kompromisu ne’ebé nia asume. Koerénsia ne’e hatudu ho atitude hatene rekoñese frajilidade sira ne’ebé halo parte realidade umana no liuhusi esforsu ida fidelidade nian ba Maromak nia ukun-fuan sira.

Download