Dili – Inspetoria FMA Timor-Indonesia (FMA TIN) moris iha lutu. Lutu tanba lakon Irmán Floriana Aparício Guterres ne’ebé fila hikas ba Aman Lalehan nia uma iha loron 17 Jullu 2018, iha Jakarta (indonesia), liuhusi terus durante fulan sanulu nia laran. Ninia terus prepara nia atu selebra ninia tinan 25 konsagrasaun nian iha “Paraíso Salesiano”.

Ho ninia mate, Ir Floriana lori Família Saleziana hamutuk, atu fó sasin kona-ba ninia fidelidade no agradese Maromak ba ninia saran an ba Maromak no ba foin-sa’e sira. Iha Missa ho ninia “isin prezente” dahuluk, Padre Provinsiál no amlulik lubuk ida, SDB no diosezanu, nune’e mós foin-sa’e sira husi MJS, Antigas Alunas, ADMA, família raan no belun barak hakonu ‘Casa Provinsiál’. Jestu furak ida iha Missa mak depoizde Komuñaun Ir Alma, Inspetora FMA TIN, fó sasin katak Irmán durante ninia moras, iha tempu halo tratamentu nian, nia halo tersu hodi hanoin atu fahe ba família iha loron selebra tinan 25 nu’udar FMA… Nia fahe mós komunidade sira, foin-sa’e sira no profesór/a sira iha ninia mai ikus nian iha Timor atu halo vistu. Nia halo tersu lubuk ida seluk no husik ba Ir. Sebastiana, Vigária Inspetoriál nia liman hodi dehan: ‘Ó rai didi’ak tersu ne’e, se Maromak hakarak ha’u selebra ha’u nia tinan 25, ha’u rasik mak sei fahe ba foin-sa’e sira atu reza tersu ba Na’i-Feto hodi hanoin ha’u. Se Maromak bolu ona ha’u, favór ida ó fahe tersu ne’e durante ha’u nia funerál’ . Nune’e ohin ha’u entrega ba família”. Liafuan sira ne’e halo prezente sira matan-been nakonu.

Missa funerál halo iha Parókia Maria Auxiliadora prezide husi Bispu Virgílio do Carmo da Silva SDB, konselebra husi  Bispu Basílio (Baucau), reprezentante Núnsiu, Pe. Mario Codamo, no amlulik na’in 33 no ajuda husi diákonu SDB ida. Kreda naresin to’o li’ur.

Iha omilia, Amu-Bispu Virgílio hateten katak maski separasaun fízika haterus maibé ita-nia fiar fó hanoin “kona-ba esperansa ema sarani nian iha realidade mate nia oin”. Ir Floriana saran nia an iha Vida relijioza ba tinan 25, “la kole, la baruk maibé buka nafatin atu lori nia krús”. Amu-Bispu hateten katak mate ba salezianu ida, ba saleziana ida sai loron vitória nian tanba hein atu tama iha ksolok Na’i ninian. Hodi sita Don Bosco rasik, nia dehan katak “Bainhira salezianu/a ida mate tan serbisu ba salvasaun klamar nian , triunfu boot ida ba Kongregasaun…Institutu simu grasa wain husi Na’i tanba fidelidade Irmán ida nian. Basá nia sei rona Na’i nia lian ne’ebé dehan ba nia: ‘Atan di’ak, atan fiél. Mai haksolok hamutuk ho ó nia Na’i”.

Iha ninia liafuan ikus depoizde agradesimentu ba ema hotu, Ir Alma ko’alia kona-ba Ir Floriana nune’e: “Loloos nia atu ba sai diretora iha komunidade Madre Morano, Fuiloro, maibé Maromak nia hanoin seluk; Ir Floriana mak Irmán dahuluk FMA Timor Oan, no nia mak ida-ne’ebé uluk liu atu loke odamatan ba Lalehan. Oras-ne’e FMA sira iha tan ona komunidade foun iha Lalehan. Iha ninia livriñu orasaun iha pájina dahuluk sira nia tau imajen/panflet orasaun ho lia-italianu kona-ba ‘Ha’u mak ne’e… Fiat voluntas Tua’. Ha’u fiar katak Ir Floriana iha nia moras nia haka’as an atu abandona nia an ba Maromak nia hakaran”.

Jestu ida ne’ebé halo durante Missa funerál nian mak Irmán na’in rua husi nina grupu, katak grupu “Diamante 93 nian”, Ir Olga Belo no Ir Jacinta Gusmão, lori koroa ai-funan ida, símbolu fidelidade nian atu tau ba Ir Floriana ninia kaixaun leten, koroa ne’ebé nia hakarak atu tau iha nia ulun iha loron agradesimentu ba tinan 25 Vida Konsagrada nian, akompaña ho knanauk “Veni Sponsa Christi”. Jestu ne’e halo ema hotu matan-been nakonu, inklui Pe. Rolando Fernandez… Hafoin Ir Jacinta no Ir Olga hato’o liafuan ruma ba Ir Floriana… Ir Jacinta no Ir Olga nia liafuan ikus mak parabéns no obrigada ba fidelidade.