Liturjia domingu da-17 konta mai ita Maromak nia preokupasaun atu habosu ema sira nia “hamlaha” ba moris. Ho forma espesiál, leitura sira domingu ne’e nian dehan mai ita katak Maromak konta ho ita atu fahe ninia “paun” ho sira hotu ne’ebé iha “hamlaha” ba domin, ba liberdade, ba justisa, ba dame, ba esperansa.

Iha leitura dahuluk, profeta Eliseu, hodi fahe  paun ne’ebé eferese ba nia ho ema sira ne’ebé hale’u nia, testemuña Maromak nia vontade atu habosu mundu nia “hamlaha”; no sujere katak Maromak mai hasoru ema kiak no mukit liuhusi jestu sira partilla no jenerozidade nian ba maun-alin sira ne’ebé “profeta” sira simu konvite atu realiza.

Evanjellu repete tema hanesan. Jezús, Maromak ne’ebé mai hasoru ema sira, nota ema lubun-boot ne’ebé tuir Nia, sira-nia“hamlaha”. Ba eskolante sira, Jezús konvida sira atu kolu lójika egoízmu nian no hatais lójika partilla nian, konkretiza iha servisu simples no haraik-an ba maun-alin sira nia benefísiu. Lójika ida-ne’e mak halo atu bele hakat sai husi eskravidaun hodi bá liberdade; ne’e maka lójika ne’ebé sei hamoris mundu foun..

Iha leitura daruak, Paulo fó hanoin ba fiar-na’in sira ejizénsia ruma vida kristán nian. Nia rekomenda sira, ho modu espesiál, haraik-an, laran-kmaus no pasiénsia: atitude sira ne’ebé la la’o hamutuk ho eskema egoízmu nian, loko-an nian, autosufisiénsia nian, prekonseitu iha relasaun sira ho maun-alin sira.

Download