Ita kontinua ho atitude sira Adventu no Natál nian atu hatán ba bolun santidade nian

Ita kontinua ho atitude sira Adventu no Natál nian atu hatán ba bolun santidade nian

Irmán, leigu no foin-sa’e doben sira,

Ita-nia Inspetoria remata Programasaun ba tinan 2018 iha fulan Dezembru no komunidade ida-idak mós hala’o ninia programasaun ba tinan 2019. Ha’u hein katak hotu-hotu (foin-sa’e, aman-inan no kolaboradór/a sira bele envolve iha prosesu ida-ne’e – nu’udar komunidade edukativa – ne’ebé husu mai ita kapasidade atu lee situasaun iha ne’ebé ida-idak hela bá no komprende, ho Maromak nia matan, oinsá haklaken Jezús nia Liafoun Di’ak ba ema sira.
Tempu Adventu nian liu ona maibé ita la bele haluha ninia konvite atu moris ho atitude sira ne’ebé tulun atu haree Maromak nia prezensa iha moris loron-loron. S. John Newman husu ba ninia an: “Saida mak vijilánsia?” no nia foti ezemplu ruma ne’ebé leno komprensaun ida ne’e. Imi hanoin bainhira imi hein belun ida no nia seidauk mai… imi sente saida? Ka bainhira tur iha meza ho ema sira ne’ebé imi la gosta: imi hein de’it katak tempu liu lalais atu hetan fali imi-nia liberdade! Imi hanoin bainhira moris iha ansiedade katak buat ruma bele mosu… ka imi hanoin bainhira imi-nia belun ka ema ne’ebé hadomi hela dook no oras-oras imi husu ba imi-nia an: “Agora nia sei halo saida? Nia sei di’ak ka lae?”. Sentimentu maizumenus hanesan sei sente bainhira ita hein Kristu ne’ebé sei hiit An mai. Matan moris no neon na’i hamutuk ho Nia dehan katak ita la haluha buat ne’ebé liu ona, maibé ita hateke ba futuru, ba buat ne’ebé sei mosu. Se ita husik ita-nia fuan nia odamatan nakloke, Jezús sei hiit an mai atu hatán ba ita-nia deseju no esperansa sira. Tinan kotu, iha omilia Natál nian, Amu-Papa Francisco hateten katak: “Maromak, ne’ebé hadomi ita, dada ita ho ninia ternura, hodi moris kiak no frajil iha ita leet, hanesan ita ida. Natál mak surpreza kona-ba Maromak ida ne’ebé labarik, Maromak kiak ida, Maromak fraku ida, Maromak ne’ebé husik Ninia kbiit atu hakbesik ita ida-idak”.
Oras ne’e, ne’ebé festa sira liu ona, ita kontinua ho atitude sira ne’e, tanba ita hakarak hatán ba bolun santidade nian. Iha ninia Estréia, Reitór-Mor repete mai ita katak ita hotu simu bolun atu sai santu, la iha sarani ida ne’ebé bele dehan katak bolun ida ne’e aas demais, ka nia la bele moris tuir ezijénsia santidade nian. Iha Estréia ita bele lee oinsá, ita-nia Família Saleziana, uluk kedas ho Fundadór sira, iha santidade nu’udar objetivu klaru liu ba moris iha vokasaun sá de’it. Ita hakfodak bainhira ita lee lista ho santu, beatu ka venerável ne’ebé halo parte Família Saleziana; hodi halimar bele dehan katak sira mak batallaun ida! Maibé Reitór-Mor fó hanoin katak, santu sira la’ós de’it sira ne’ebé Kreda rekoñese nu’udar santu, maibé bele define santu ema bainbain barak, ne’ebé la’o hamutuk ho ita no hatudu mai ita Maromak nia domin.
Ha’u remata ho lia-menon ida ne’e: uluknanai katak ita ida-idak hatene rekoñese “santidade bainbain” ne’ebé haleu ita, hodi agradese Maromak tanba ema sira ne’e tulun ita atu sente Maromak nia prezensa, no mós ha’u hein katak iha ita, ida-idak, la bele kuran hakarak forte no forsa atu sai santu no kontinua atu hanaruk lista santidade nian.

Tinan 2019 nakonu ho santidade!

Irmán Alma Castagna

Tags: santidade