Halo “Marian Camp” atu la’o tuir Na’i-Feto nia ain-fatin

Halo “Marian Camp” atu la’o tuir Na’i-Feto nia ain-fatin

Baucau – Fulan Maiu mak fulan marianu ka fulan Virjen Maria nian, familia saleziana hanaran mós fulan salezianu tanba iha santu/a lubuk ida mak Kreda fó loron ida signifikadu atu halo festa ka halo memoria ba sira-nia loron iha fulan ne’e nia laran, santu/a sira ne’e mak San Domingos Savio ne’ebé selebra ninia festa iha loron 6 fulan Maiu, Solenidade Santa Maria Domingas Mazzarello selebra iha dia 13 no liuliu solenidade Maria Ausiliadora nian ne’ebé sei selebra iha loron 24 fulan ne’e.

Nune’e nu’udar saleziana lahusik leet de’it festa hirak ne’e, tanba festa no solenidade hirak ne’e parte ona ita FMA sira-nia DNA. Nune’e tuir vizaun no misaun no planu estratejiku oratoriu Maria Ausiliadora Teolale nian, katak tulun labarik, foin-sa’e no familia sira atu hakle’an sira-nia fiar no haburas sira-nia devosaun ba na’in feto fasilita dalan ba santidade nian. Nune’e mak ohin loron 12 fulan Maiu 2019, Ir. Lucia hamutuk ho animador/a sira organiza kampu marianu ba labarik, foin-sa’e no aman inan sira. Programa ida hahú husi tuku 8.30- 05 lokraik. Iha kampu marianu ida ne’e, maske ami hakarak atu halo de’it ba oratorianu sira Teulale ho sira-nia aman-inan, maibé wainhira hato’o ba amo Paroko, Pe. Manuel Ximenes no Pe. Agnelo Jeronimo Moreira diretór komunidade SDB nian, sira propoin atu joven sira husi parokia, no husi sentru sira mós partesipa atu sira bele koñese di’ak liután na’in feto. Tanba ne’e iha kampu ne’e konvida joven sira husi Maukale, Dewake no oratoriu sentru no MJS sira hotu mai partesipa, nune’e total hamutuk 240 pesoas lasura familia sira ne’ebé mak mai haree de’it drama kona-ba na’in feto.

Kampu marianu ne’e la’o ho susesu agradese ba ema barak nia kontribuisaun materiál no espirituál. Kona-ba espirituál mak Pe. Agnelo no Pe. Manuel suporta hodi selebra Misa iha tuku 11.00-12.00. Husi emprezariu balun no familia sira ne’ebé ho domin boot, sira tulun ami hodi fó hahan meudia nian ba partesipante sira, no inan-aman sira ne’ebé oferese sira-nia tempu no sakrifika an hodi teen. Partesipante sira bele dehan katak han di’ak no reza di’ak.

Prosesu kampu marianu ne’e nian mak: atualiza Maria Nazare ninia itineráriu katak la’o tuir Maria-nia ain fatin husi Nazare to’o Kalvariu no iha itenerariu ida-idak iha santu ida nia espriensia kona-ba Maria, nune’e iha Nazare konfrontu no espriensia umana mak Domingos Savio nia ralasaun ho Maria, iha Ain Karim, joven Francisco Besucco nia esperiensia, iha Belen joven Beato Zefferino Namuncurá, iha Templu Miguel Mgone, iha Kana Galileia Santa Maria Mazzarello ninia esperiensia mariana, iha Golgota, BEATO AUGUSTO CZARTORYSKI. Metodu mak husi dader  knana’in hakle’an Evanjellu iha grupu hafoin husi tuku 2.30-05.00 dramatizasaun. Hotu tiha atividade ne’e ema hothotu simu merenda hafoin ida-idak fila fali ba nia uma.

Joven no labarik sira fila ho haksolok tanba ba sira esperiensia ida furak liu iha sira-nia moris. Liuliu tanba molok hahú kuaze ami hotu angostia tanba hodi haree ba lalehan nakukun udan hahú xuviska maibé Ir.Lucia husu ba partesipante sira atu iha fiar boot no laran metin iha Maria tanba se nia hakarak atu ema koñese nia di’ak liután nia tenke haparan udan. Nune’e maske na’in feto koko ami dala rua husi dadersan udan atu tau sala-sala, la tau hafoin tuku 12.00 kalohan nakukun boot maibé la udan. Wainhira hotu tiha ema ki’ik eh boot ho fuan haksolok hodi agradese ba inan lalehan ba grasa ne’ebé ami simu. Don Bosco nia liafuan “habelar devosaun ba Virjen Maria imi sei haree sa mak milagre” kontinua realiza iha tempu ohin loron, agradese ba eventu ida ne’e halo joven sira koko iha sira-nia moris rasik.

(Lucia Pereira)