Maun no biin-alin sira, bondia!

Evanjellu ohin nian lori ita iha Senákulu atu halo ita rona Jezús nia liafuan ruma ne’ebé diriji ba eskolante sira iha “diskursu despedida nian” molok ninia paixaun. Fase tiha sira Na’in-Sanulu-resin-rua nia ain, Nia dehan ba sira: «Ha’u fó ukun-fuan foun id aba imi: atu imi hadomi malu. Hanesan ha’u hadomi imi, nune’e, imi mós hadomi malu » (Jo 13,34). Maibé iha sentidu saida mak Jezús hanaran “foun” ba ukun-fuan ida-ne’e? Tanba ita hatene katak iha Testamentu Tuan Maromak fó tiha ona orden ba nia povu atu hadomi maluk hanesna an rasik (kf. Lv 19,18). Jezús rasik, bai da-ne’ebé husu ba Nia sá loos ukun-fuan boot liu Lei nian, hatán katak ida uluk mak hadomi Maromak ho fuan tomak no daruak hadomi maluk hanesan an rasik (kf. Mt 22,38-39).

Entaun, sá loos novidade ukun-fuan ne’ebé Jezús entrega ba ninia eskolante sira? Tanba sá Nia hanaran “ukun-fuan foun”? Ukun-fuan tuan domin nian sai foun tanba kompleta ho buat ne’ebé nia hatutan: «nu’udar ha’u hadomi imi», «imi hadomi malu nu’udar ha’u hadomi imi». Novidade iha Jezús Kristu nia domin, domin ne’ebé Nia hodi fó nia moris mai ita. Ne’e mak Maromak nia domin, universál, lahó kondisaun no limite sira, ne’ebé ita hetan nia tutun iha krús. Iha momentu hatún-an maka’as nian, iha momentu abandonu Oan nian ba Aman, Maromak nia Oan-Mane hatudu no haraik ba mundu domin nia plenitude. Hodi hanoin hikas fali Kristu nia paixaun no agonia, eskolante sira komprende signifikadu ninia liafuan sira-nian: «Nu’udar ha’u hadomi imi, nune’ e mós imi hadomi malu».

Jezús mak hadomi uluk ita, nia hadomu maski ita-nia frajilidade sira, ita-nia limite sira no ita-nia frakeza umana sira. Nia mak halo ita sai dignu ba ninia domin ne’ebé la hatene limite ni nunka remata. Hodi haraik ukun-fuan foun, Nia husu mai ita atu hadomi entre ita, la’ós de;it no laós ho ita-nia domin, maibé, ho ninian, ne’ebé Espíritu Santu tau iha ita-nia fuan sira se ita invoka nia ho fiar.Ho modu ne’e – no nune’e de’it – ita labele hadomi entre ita, la’ós de’it nu’udar ita hadomi an rasik, maibé nu’udar Nia hadomi ita, katak maka’as liután. Defaktu, Maromak hadomi liu ita, liufali ita hadomi ita an rasik. Nune’e ita bele habelar iha fatin hotu fini domin nian ne’ebé hafoun relasionamentu sira entre ema no loke orizonte esperansa nian. Jezús sempre loke orizonte foun, maun no biin-alin sira iha Na’I, no halo ita Maromak nia Povu foun, katak Kredam iha-ne’ebé hotu-hotu simu bolun atu hadomi Kristu no iha Nia hadomi malu.

Domin ne’ebé hatudu iha Kristu nia krús no Nia bolu ita atu moris mak forsa ida mesak ne’ebé transforma ita-nia fuan fatuk nian iha fuan isin nian; forsa ida mesak ne’ebé iha kbiit atu transforma ita-nia fuan mak Jezús nia domin, se ita mós hadomi ho domin ida-ne’e. No domin ida-ne’e halo ita iha kbiit atu hadomi funu-balu sira no perdua ema sira ne’ebé ofende ita. Ha’u sei halo pergunta ida ba imi, no ida-idak hatán iha nia fuan. Ha’u iha kapasidade atu hadomi ha’u-nia inimigu sira? Ita hotu iha ema, ha’u la hatene se inimigu, maibé iha-ne’ebé la konkorda ho ita, ne’ebé ‘iha parte seluk’; ka ema ruma iha ema ne’ebé halo aat mai ita… Ha’u iha kbiit atu hadomi ema ne’e? Mane ne’e ka feto ida-ne’e ne’ebé halo aat mai ha’u, ofende ha’u? Ha’u iha kbiit atu perdua nia? Ida-idak hatán iha ninia fuan. Jezús nia domin halo ita haree ema seluk nu’udar membru atuál ka futuru ne’ebé hola parte ba komunidade Jezús nia belun sira-nian; dudu ita ba diálogu no tulun ita atu rona no koñese malu. Domin ne’ebé loke ita ba ema seluk, sai baze relasionamentu umanu sira-nian. Nia halo ita iha kapasidade atu supera barreira sira frakeza rasik no prejuizu ne’ebé ita iha. Jezús nia domin iha ita kria ponte sira, hanorin lurón foun sira, hamosu dinamizmu fraternidade nian.

Atu Virjen Maria tulun ita, ho ninia intersesaun inan nian, atu hakohak nia Oan Jezús nia ukun-fuan, no husi Espíritu Santu forsa atu pratika ukun-fuan ne’e iha moris moris loroloron nian.