Tranzmisaun Planu Komunikasaun Institusionál

Tranzmisaun Planu Komunikasaun Institusionál

Laga – Enkontru kona ba transmisaun polítika KOMSOS nian aprezenta husi Madre Jacinta Gusmão nu’udar responbel ba ambitu Komunikasaun, enkontru ida ne’e hala’o iha komunidade Beata Laura Vicuña Laga, loron sábadu 01 de Juñu 2019 hahu tuku 09.30 no remata tuku 3.30 otl, partisipante sira mak irman juniora no perpetua balun, husi komunidade hotu ne’ebé eziste iha Timor, irman sira ne’e hamutuk  21.

Iha sesaun dahuluk nian, madre aprezenta kona ba planu komunikasaun Institutu nian, no aprezenta kona ba estrutura no  istoria kona ba ambitu komunikasaun nian, hafoin foka liu kona ba fundamentu karismatiku ita nia instutu nian, katak ita nia misaun mak atu Eduka no komunika, hanesan iha komunidade dahuluk Valdoco no Mornese, hola parte ba ekosistema  ne’ebé ho nia vizaun mak simu knar atu eduka no komunika, kapasidade atu kria relasaun ne’ebé sustentabel,  relasaun interpessoal ne’ebé tulun ita nia moris ba oin. Haree ba Don Bosco no MM nia esperiensia misaun nian bele dehan, sira la mesak depende ba ema seluk, hanesan   leigu, labarik, foinsa’e, familia, nune’e iha relasaun ekosistema hodi haree ba Don Bosco no MM nia esperiensia,  nu’udar pergunta ida ba ita FMA  sira tempu ohin loron nian oinsa ita nia relasaun misaun nian ekosistema ho  ema seluk ka lae?. FMA ida-idak  mak nu’udar edukomunikadora ne’ebé  komunika valores, proposta umana, proposta espirituais la’o ho valor sira ohin loron nian, ita eduka no komunika halo Kristu sai buras iha ita nia-an no ema seluk.

Hafoin aprezentasaun badak, fahe ba grupo atu reflete no fahe kona ba MM nia surat, ne’ebé ho pergunta ;  oinsa figura MM nu’udar Edukomunikadora, no buka atu identifika karakteristika Edukomunikadora husi MM. hodi reflete no fahe hamutuk iha grupo ikus mai, karakteristika ne’ebé deskobre no hetan iha MM nia surat sira mak hanesan; MM feto komuñaun nian, inan ne’ebé nafatin fo atensaun no preukupa ba nia irman sira, maske la koñese no laiha meius komunikasaun hanesan tempu agora, MM nia surat hatudu dialogu ne’ebé besik, perguntas direita, istilu familiar, cordial, enkoraja, respeita ema nia ritmu, hatudu relasaun edukativa positivu, istilu kolokial, hatene koñese ,  dialogu iha tempu rekreiu, espresaun ne’ebé simples maibé klean. Haree esperiensia MM nian  bele dehan halo ema atu  sai ekosistema komunikasaun nian, uniaun iha  Espiritu, misaun no lori objetivu ba-an rasik mak santidade, figura MM inspira ita atu sai feto edukomunikadora, MM feto ne’ebé la hetan edukasaun ne’ebé aas maibé husi ninia moris no esperiensia sira hatudu klaru katak nia mak feto edukasaun.

Iha sesaun daruak nian madre aprezenta kona ba  Logo Instituto nian no planu komunikasaun institutu nu’udar kuadru referensia esensial;

  • Objetivu husi planu, tansa iha planu ida?  Objetivu mak atu fo vizibilidade ba karisma saleziana atu la’o ho foinsa’e sira atu fo moris no kultura ,atu moris iha ohin loron.
  • Vizaun: mak sai ekosistema edukomuniksaun makro iha web
  • Misaun mak promove integrasaun ekosistema Edukomunikasaun Institutu FMA nian, iha serbisu rede nian ho entidade sivil no organizmu sira kreda nian.
  • Senariu: rede ne’ebé transforma ita nia mundu
  • Profesia: kontemporaniedade nian, ita nia presiza tenke sai profesia
  • Pedagojia ambiente nian.
  • Sustentabilidade

Ikus liu aprezenta kona ba polítika komunikasaun nian iha dalan 5 importante  mak hanesan; animasaun, formasaun, informasaun, produsaun no jestaun no ho lais manual komunikasuan viziva.

(Maria Sarmento Guterres)