Kampu santidade juveníl

Kampu santidade juveníl

Dili – Kampu  Santidade Juveníl, OPIAM  zona Dili nian , hala’o durante loron ruahusi 5-6 Juñu, iha Dili Comoro, eskola Maria Auxiliadora,  partisipante sira mai husi, grupo Infánsia Misionária bairu Maria Auxiliadora Raihun, Tasi-Tolu, Balide no eskola Maria Auxiliadora. Partisipante sira hamutuk 120. Loron dahuluk nian hahu ho welcome tuku 2.00, hafoin orasaun, liafuan benvinda husi madre Sebastiana, ne’ebé hato’o katak: “ imi mak Infánsia Misionária no pre-adolescente missionaria, imi nia knar tenke to’o iha dalan santidade, uluknanain tenke sai profeta iha imi nia moris lorloron, haklaken Kristu ba ema seluk. Imi bele sai santu  kiik iha moris lorloron, liu husi imi nia moris no atetude kiik ne’ebé imi halo, imi bele sai  hanesan figura santu/a sira ne’ebé imi sei haklean no koñese. Nune’e aproveita didiak oportunidade ida ne’e, benvindos ba imi nia camping Santidade juvenile, wainhira imi fila imi sai belun no koñese diak liu tan santu sira. Hafoin entrega figura santu juvenile ida-idak ba grupo sira, figura santu sira ne’e mak hanesan; B. Laura Vicuña, Maria Gorreti, Domingos Savio,  S.Tarcisio,Jacinta Marto, no Francisco Marto. Hafoin sira haklean figura Santu/a  sira nia iha grupo laran. Depois de haklean santu/a sira nia moris iha grupo, iha kalan iha mos jogus santidade no sunu ahi klobor iha Rosario nia laran.

Loron 06 –Junho, atividade ne’ebé grupo OPIAM sira hala’o mak grupo  ida –idak ne’ebé haklean ona Santu/a  sira nia moris, la’o ba haklaken iha  grupo hotu, atu nune’e grupo sira seluk bele mos iha koñesementu kona ba Santu/a seluk nia moris. Buat ne’ebé sira lori ba haklaken mak kona ba identidade santo/a sira nian no  sira nia vertude diak sira.

  • Saun Tarcisio mak santu ida ne’ebé iha domin boot ba Eukaristia, fiar boot, atenbrani, laran diak no pasiensia, santu ida ne’e moris iha 14- agostu tinan 250, nia motto mak : “ Ha’u lori Santissimo tau matan didiak ba Nia”.
  • Santa Maria Goretti moris iha Corinaldo Italia 19-outubro-1890 mate iha 05-07-1902, ninia vertude fiar boot ,laran moos perdaun, badinas, sakrifisiu no atenbrani. Ninia motto : “Diak liu mate molok monu ba sala ka ofende Maromak”
  • Santa Jacinta Marto, moris iha Fatima Portugal, 11-03-1910,  ninia vertude, laran luak, laran mos, harohan nain, fiar nain, sakrifisiu, ninia motto: “ Diak liu mate duke halo kanek ha’u nia Jezús nia futar fuan”.
  • Santu Domingos Savio, ninia vertude, laran diak, laran kmaus, hakmatek, simples, obediente, harohan nain, fiel ba sakramentu sira, devosaun boot Nain feto ninia mate: “ Diak liu mate duke halo sala”.
  • Beata Laura Vicuña, moris iha Santiago Chile, 05-04-1891, mate 222-01-1904 iha Junin de los Andes ( Argentina) ninia vertude haksolok, badinas, haraik-an, laran luak, domin nain, sakrifisiu.

Hafoin la’o ba haklaken iha grupo sira, kontinua kedas ho missa enseramentu ne’ebé hala’o iha Parokia Maria Auxiliadora Comoro no amo Pároco Pe. Elias de Deus SDB, mak selebra Eukaristia ne’e. Missa  hahu oras 11.00 otl, iha  ninia omilia nia dezafia Infánsia Misionária no pre-adolescente missionaria sira atu sai santu ne’ebé  hadomi Jezús no kontra ka hakribit sala, hanesan figura santu/a sira ne’ebé sira haklean tiha ona. Depois de missa ikus nian taka ho avaliasaun no komprementa komunidade.

(Maria Sarmento Guterres)

Tags: OPIAM, santidade