Matadalan atu hakle’an Christus Vivit

Matadalan atu hakle’an Christus Vivit

Christus Vivit mak ezortasaun apostólika pos-sinodál Bispu sira-nian, hala’o iha Outubru 2018, kona-ba tema “Joven sira, fiar no dixernimentu  vokasionál”, ne’ebé Papa Francisco assina iha 25 Marsu 2019, iha Loreto (Itália), solenidade Anunsiasaun nian.
Iha-ne’e, ami aprezenta matadalan ba leitura dirije ba ajente pastorál sira. Ho matadalan ida-ne’e ita hein, bele hamanas liután ita membru sira Família Saleziana nian, atu haree Kreda tuir Papa Francisco nia hakarak, atu haree foin-sa’e sira nu’udar Kreda nia prezente.

Introdusaun

Christus vivit, ka Kristu Moris! mak dokumentu ida furak no riku ne’ebé kompleta prosesu formál Sínodu 2018 nian kona-ba Joven, fiar no dixernimentu vokasionál. Ida-ne’e la signifika katak sínodu remata ona; parte importante hahú depoizde sínodu, katak, ninia implementasaun iha Kreda tomak.

Amu-Papa konvida ita ba esperiénsia dixernimentu nian, esperiénsia ne’ebé nia rasik halo durante prosesu sínodu nian, esperiénsia ida, iha-ne’ebé nia hasoru foin-sa’e sira nia realidade hodi rona sira ho atensaun.

Iha tema prinsipál rua ne’ebé karakteriza Papa Francisco nia abordajen iha Christus vivit: importánsia rona nian no doutrina inkarnasaun nian. Dokumentu ne’e mai husi orasaun no raronak ho atensaun, no konvida ita atu halo hanesan. Razaun atu rona mak iha foin-sa’e sira nia fuan ita bele hahú komprende sinál sira tempu nian, iha-ne’ebé Maromak bolu ita ohin-loron.

Iha matadalan ida-ne’e ita seu foti tema-xave ruma dokumentu nian atu hahú esplora, tema sira relevante ba Kreda nia kontestu oioin.

Dokumentu Christus Vivit laiha konkluzaun no proposta boboot, maibé buka atu hatudu oinsá dixerne, rona no akompaña foin-sa’e sira iha sira-nia kontestu. Foin-sa’e sira ne’ebé dokumentu refere mak otas husi tinan 16-29, katak husi momentu sira para sai labarik, maibé molok sira sai estavel iha moris, iha tinan 30 nune’e.

Ita sei foka iha parte haat hodi refere mós ba númeru espesífiku dokumentu nian, no fó mós pergunta ruma atu uza individualmente ka nu’udar grupu, atu tulun reflete konseitu sira Papa Francisco aprezenta. Di’ak liu mak lee dokumentu tomak.

 

Fuan foin-sa’e

“Jezús rasik, foin-sa’e ba nafatin, hakarak haraik mai ita fuan sira ne’ebé foin-sa’e nafatin. Maromak nia Liafuan husu ita atu “soe fermentu tuan atu ó bele sai masa fresku” (1 Cor 5:7)” (13)

 

Bainhira Papa Francisco ko’alia kona-ba joven iha Christus vivit, nia fó hanoin mai ita katak Jezús rasik joven, buat ruma ne’ebé, maski klaru, karik ita ladún hanoin kona-ba ne’e – Jezús tinan 33 de’it bainhira ema hedi iha krús. Maski iha istória bíblika iha ida de’it kona-ba Jezús foin-sa’e entre ezíliu iha Ejitu ho Maria no José no ninia batizmu, iha tradisaun barak ne’ebé fó indikasaun ruma mai ita kona-ba ninia moris. Papa Francisco subliña katak nia moris hanesan joven ida iha ninia tempu moris nian. Jezús la haketak nia an no hadook nia an husi ninia família, ninia kultura no ninia sosiedade.

Molok nia inan-aman deskobre Jezús iha templu nu’udar labarik foin-sa’e ida, Papa Francisco sujere katak Maria no José hanoin katak Nia la hamutuk ho sira tanba nia «hamutuk ho sira seluk, ko’alia halimar ho foin-sa’e sira seluk, rona adultu sira konta istória sira no konpartilla grupu nia ksolok no susar sira» (29). Ko’alia diretamente ba joven sira Papa Francisco hateten «importante liu ba imi atu kontempla Jezús foin-sa’e hanesan Evanjellu sira aprezenta, basá Nia loos duni ida hanesan imi, no konpartilla imi-nia fuan foin-sa’e sira nia karakteritika sira» (31). Papa Francisco indika ba figura barak selukTestamentu Tuan nian no santu sira iha Kreda atu espresa buat ne’e hotu.

Juventude la’ós kona-ba otas. «Adultu sira mós tenke sai tasak hodi la lakon valór sira juventude nian» (160). Iha Christus vivit juventude mak liuliu, atitude ida, dispozisaun ida naturál ba foin-sa’e sira, maibé dalabarak husik ita bainhira ita nia otas aumenta. Hodi sita S. Paulo Papa Francisco dehan katak juventude mak «kompaixaun, laran-di’ak, haraik-an, laran-kmaus no pasiénsia, terus malu no perdua malu bainhira ema ida iha buat ida atu kesar kona ba ema seluk», atu habadak Papa Francisco dehan katak «juventude loloos katak iha fuan ne’ebé iha kapasidade atu hadomi, no buat hotu ne’ebé haketak ita husi ema seluk mak halo ita nia klamar sai katuas-ferik» (13). Juventude iha Christus vivit mak abertura ba prezente, ba realidade ne’ebé akontese hale’u ita. Fundamentalmente juventude iha Christus vivit bazeia ba modelu aprosimasaun Kristu nian, núkleu ita-nia fiar nian (65).

Papa Francisco fó mai ita ezemplu ida kona-ba ema ida, ne’ebé iha sirkunstánsia klot no susar nia moris nian, nia mantein ninia juventude. Kardeál Francis Xavier Nguyen Van Thuận dadur iha kampu konsentrasaun Vietnam nian ida maibé nia rejeita atu halo nia moris lakon iha nia oin hodi uza nia tempu sura loron sira ema dadur nia no hein atu hetan libertasaun. Iha kontráriu, nia ‘hili’ atu «moris momentu prezente, hakonu nia ho domin to’o naresin. Nia deside: ‘Ha’u sei kaer metin okaziaun sira ne’ebé aprezenta loroloron; Ha’u sei hala’o asaun ordinária ho maneira estraordinária’» (148).

Hanesan Kardeál Thuận nia ezemplu hatudu mai ita, ita moris ho maneira joven no matan moris iha tempu prezente la’ós de’it iha tempu di’ak sira. Dala barak iha difikuldade sira mak ema iha ansiedade no taka an no buka seguransa iha solusaun fasil sira, «ita-nia mehi sira ne’ebé di’ak liu alkansa de’it liuhusi esperansa, pasiénsia no empeñu» (142). Ho modu hanesan Jezús: Nia esperimenta juventude, Jezús mós terus. Hodi sita Bispu sira Switzerland nian Papa Francisco dehan katak, «Maromak horik iha-ne’ebé ita hanoin katak nia husik tiha ita no la iha ona esperansa salvasaun nian. Ne’e paradoksu ida, maibé ba sarani barak, terus no nakukun sai tiha … fatin enkontru nian ho Maromak» (149).

La importante ita tinan hira, juventude mak dispozisaun ida ne’ebé iha ita-nia alkanse. Papa Francisco rasik dehan mai ita katak nia esperimenta ida-ne’e: «Bainhira ha’u hahú ha’u-nia ministériu nu’udar Papa, Na’i haluan ha’u-nia orizonte sira no haraik mai ha’u juventude foun. Buat hanesan bele akontese ba kaben-na’in sira ne’ebé hamutuk ona ba tinan barak ka ba monje ida iha ninia monastériu. Iha buat sira ne’ebé ita tenke “husik” bainhira tinan sira liu, maibé kreximentu iha maturidade bele hela hamutuk ho ahi ne’ebé halakan nafatin, ho fuan ne’ebé foin-sa’e nafatin» (160).

  • Ó, uluk nu’udar foin-sa’e ó kontempla Jezús?
  • Hodi imajina Kristu foin-sa’e tulun ó atu haree Ninia reflesu iha foin-sa’e sira ne’ebé ó koñese?
  • Ha’u ema ida ne’ebé nafatin atensaun ba prezente, no ba ksolok sira ne’ebé nia bele lori mai?

Lee ho modu partikulár: 12, 13, 15, 18, 20, 23, 31, 134, 148, 149, 160.

 

Kreda foin-sa’e

«Mai ita husu Na’i atu liberta Kreda husi sira ne’ebé hakarak halo nia sai tuan, hametin nia iha tempu uluk nian, kaer metin nia ka halo nia la la’o bá oin» (35)

 

Iha Christus vivit juventude la’ós de’it otas no períodu ida tempu nian, maibé atitude ida, ne’ebé Papa Francisco fiar katak Kreda tenke promove atu evita nia sai paradu, muzeu ida kuriozidade nian. Maibé katak sá ba intituisaun ida tuan hanesan Kreda mantein ninia juventude? Nia maneira serbisu nian tenke karakteriza ho «kompaixaun, laran-di’ak, haraik-an, laran-kmaus no pasiénsia, terus malu no perdua malu bainhira ema ida iha buat ida atu kesar kona ba ema seluk» (Col 3:12-13).

Christus vivit sita maka’as Dokumentu Finál prosesu Sínodu nian. Iha nia Padre Sínodál sira ko’alia kona-ba nesesidade ba Kreda Sinodál ida – katak, Kreda ida ne’ebé rona no serbisu iha kolaborasaun – maibé Papa Francisco hakat liu ida-ne’e no buka atu demonstra prátika sira ne’ebé hatudu saida mak sinodalidade iha ninia prátika. Sinodalidade ezije atu Kreda ne’ebé la «hanoin nia an resin maibé, no liu buat hotu, reflete Jezús Kristu. Ne’e signifika ho haraik-an rekoñese katak buat ruma presiza atu muda konretamente, no atu ida-ne’e bele mosu, nia presiza apresia foin-sa’e sira-nia vizaun no krítika» (39).

Maski nune’e, dalabarak, «membru sira Kreda nian la tuir nafatin Jezús nia atitude. Liu fali rona foin-sa’e ho atensaun, “dala barak liu, iha tendénsia atu fó resposta ne’ebé prepara no falun didi’ak ona –solusaun sira ne’ebé halo nanis» (65), maibé «bainhira Kreda husik eskema ríjidu sira no rona ho atensaun ba foin-sa’e sira, empatia ne’e hariku nia, basá nia husik foin-sa’e sira fó sira rasik nia kontribuisaun ba komunidade, hodi tulun nia apresia sensitividade foun sira no konsidera kestaun foun sira» (65).

Buat ne’ebé la signifika simu buat hotu mundu nian no «atua hanesan ema hotu» (35). «Lae! Kreda foin-sa’e bainhira nia mak nia an rasik, bainhira nia simu kbiit ne’ebé foun nafatin husi Maromak nia futar Lia, husi Eukaristia, no husi Kristu nia prezensa loron-loron no husi Espíritu nia kbiit iha ita-nia moris» (35). Papa Francisco aprezenta mai ita impulsu ida ne’ebé ita tenke nafatin mantein – ita labele haketak an husi ema seluk, konsdera an nu’udar viziñu di’ak hanesan apóstolu sira «ne’ebé hetan favór husi povu tomak» (Apóst 2:47; cf. 4:21.33; 5:13) maibé mós labele la ‘hatudu ideál ne’ebé la hanesan sira mundu nian, hodi fó sasin kona-ba laran-luak, serví ema, laran-moos, perseveransa, perdaun, fidelidade ba ita rasik nia vokasaun, orasaun, buka justisa no ema hotu nia di’ak, domin ba ema kiak sira, no amizade sosiál nia furak» (36).

Atu halo ida-ne’e ezije risku atu konfia iha Espíritu Santu ne’ebé serbisu iha Kreda liuhusi ema sira hale’u ita. Ita tenke dedika ita-nia an ba esperansa liufali ta’uk ne’ebé kesi metin ita ba pasadu. Nia hateke ba situasaun espesífika kona-ba feto nia papél iha Kreda hodi buka esplika: «Kreda ne’ebé ta’uk liu no kesi metin nia an ba estrutura sira bele sai krítika liu kontra ema nia esforsu atu defende feto sira-nia direitu, no hatudu nafatin risku no hanorin sala sira ne’ebé bele mosu tan esforsu sira ne’e. Maibé, Kreda ne’ebé moris bele reaje hodi fó atensaun ba reklamasaun lejítima husi feto sira ne’ebé buka justisa no igualdade boot liután» (42).

  • Sá loos mak ain-hakat ki’ik sira ne’ebé Kreda bele halo ba ó-nia komunidade atu tulun nia kaer metin nia foin-sa’e sira?
  • Oinsá ó serbisu iha kolaborasaun atu envolve ó-nia komunidade?

Lee liuliu: 34, 35, 36, 37, 38, 41, 42, 65, no husi Dokumentu Finál Sínodu n. 119-127.

 

Simu foin-sa’e sira

«Ita-nia instituisaun sira tenke oferese ba foin-sa’e sira fatin sira ne’ebé sira bele jere tuir sira-nia gostu, iha-ne’ebé sir abele tama no sai livremente, fatin sira ne’ebé simu sira no iha ne’ebé sira bele bá ho modu espontáneu no ho konfiansa  atu hasoru foin-sa’e sira seluk, iha tempu terus no iha frsutrasaun, nune’e mós bainira sira hakarak festeja ksolok» (218)

 

Iha kapítulu datoluk Christus vivit nian, Papa Francisco subliña katak foin-sa’e sira mak Kreda nia tempu prezente, la’ós de’it ninia futuru. Se ita lakon ida-ne’e, ita la rekoñese kontribuisaun sira ne’ebé sira halo ohin-loron. Dalabarak Kreda la rona ka la fó espasu ba foin-sa’e sira: ita rejeita sira nu’udar krítiku  Kreda nian, ka halo sira nonok ho resposta “ida de’it” ba sira nia kestaun no preokupasaun sira. Sira-nia laran la hakmatek no paixaun mak buat ruma atu apresia, la’ós atu haree nu’udar risku. Hodi sita S. Paulo VI, Papa Francisco dehan «Iha laran la kontenti rasik ne’ebé imi dalabarak sente … horik raiu ida naroman nian», nia kontinua, «laran la kontenti ne’ebé halo imi la hakmatek, hamutuk ho ksolok bainhira imi haree orizonte foun sira, hamosu aten-barani ne’ebé lori imi atu hamriik no kaer responsabilidade ba misaun ida» (138).

«Ita-nia instituisaun sira tenke fó ba foin-sa’e sira fatin ne’ebé sira bele halo sira ninian, iha-ne’ebé sira bele bá no mai ho liberdade, fatin ne’ebé em simu sira no sira bele ná espontaneamente no ho konfiansa atu hasoru foin-sa’e sira seluk, iha tempu susar no frustrasaun nian, nune’e mós bainhira sira hakarak festeja sira-nia ksolok» (218).

Dalaruma resposta badak ka lahó atensaun ba foin-sa’e sira tanba ita la hatene oinsá hatán. Maibé, loloos, ita la presiza hatán maibé simplesmente halo sira sente katak ita simu sira, rona no buka komprende sira-nia mundu. «Bainhira Kreda husik eskema ríjidu sira no rona ho atensaun ba foin-sa’e sira, empatia ne’e hariku nia, basá nia husik foin-sa’e sira fó sira rasik nia kontribuisaun ba komunidade, hodi tulun nia apresia sensitividade foun sira no konsidera kestaun foun» (65).

Papa Francisco ba dook liután hodi dehan katak presiza de’it rona foin-sa’e sira; ba nia, foin-sa’e sira bele tulun ita komprende buat ruma Maromak nian no saida mak Nia hakarak husi Kreda oihin-loron. «Tenke haree foin-sa’e ida-idak nia fuan nu’udar “rai lulik”, maklorik fini Maromak nian, iha nia oin mak ita tenke “hasai ita-nia sapatu sira” atu ita bele hakbesik an no tama kle’an liu tan iha Mistériu» (67).

«Presiza aldeia tomak atu hakiak Labarik ida» tuir provérviu popular afrikanu, maibé ida-ne’e mak buat ruma Papa Francisco bele dehan basá nia sente katak apoia foin-sa’e sira la’ós papél ida ba ema sira envolve iha pastorál juveníl, komunidade tomak iha responsabilidade. Komunidade tenke halo uma, família ba foin-sa’e sira: «Komunidade iha papé importante iha foin-sa’e sira nia akompañamentu; komunidade tenke sente responsavel, nu’udar komunidade, atu simu, motiva, fó aten-barani no fó dezafiu ba sira. Ema hotu tenke haree foin-sa’e sira ho komprensaun, apresiasaun no afetu, no hadook an husi julga nafatin sira ka ezije husi sira perfeisaun ne’ebé liu fali sira-nia otas» (243).

Buat ida importante liu mak simu foin-sa’e sira no joven adultu sira, kria espasu iha-ne’ebé sir abele hasoru malu no hasoru ema husi jerasaun seluk. Ita la presiza abilidade espesiál, maibé simplesmente rona, «ema ne’ebé rona ho modu ativu foin-sa’e sira-nia nesesidade no hatán ba sira ho laran-di’ak; ema ne’ebé nakonu ho domin konxiente kona-ba an rasik; ema ne’ebé rekoñese nia limitasaun rasik no sai espesialista iha viajem espirituál nia ksolok no susar» (246).

Karik dezafiu boot liu atu simu foin-sa’e sira mak asegura katak ita rasik nafatin haka’as an ba santidade. «Atu akompaña ema seluk tuir dalan ne’e, ó mak tenke tuir uluk dalan ne’e, loron-loron. Ne’e mak buat ne’ebé Maria halo, bainhira nia sei foin-sa’e, bainhira nia enfrenta nia rasik nia kestaun no difikuldade sira. Atu Maria hafoun ó-nia juventude ho nia orasaun nia kbiit no akompaña ó nafatin ho nia prezensa nu’udar inan» (298).

 

  • Ba ó foin-sa’e sira mak uluknanai Kreda nia prezente ka ninia futuru?
  • Ó sente parte komunidade ne’ebé serbisu hamutuk ba foin-sa’e sira nia di’ak, ka ó sente ó katak ita namkari?

Haree liuliu pasajen sira: 39,40, 64 – 67, 111, 168, 203 – 208, 224 – 229, 239, 240, 242, 243, 246, 248, 258, 297, 298.

 

Nesesidade  atu iha abut sira

«Se ita la’o hamutuk karik, foin-sa’e no katuas sira, ita bele iha abut metin ohin no husi pozisaun ida-ne’e, ne’e vizita fali pasadu no hateke ba futuru» (199).

 

Iha parte dahuluk matadalan ida-ne’e nian ita ko’alia kona-ba juventude la’ós nu’udar otas ka idade, maibé dispozisaun ne’ebé karakteriza ho atensaun ba realidade prezente nian, abertura no laran-luak espíritu nian. Iha Christus vivit, Papa Francisco hakarak fó ba foin-sa’e sira Liberdade atu mehi, atu mrois iha prezente; maibé nia mós la hakmatek ho risku sira ne’ebé mai hamutuk ho ida-ne’e. Nia uza analojia ai-hun nurak no furak ida ho sanak sira to’o lalehan ne’ebé hanesan “knananuk ida esperansa nian. Tuir mai, liu tiha anin boot, ha’u hetan sira monu no mate. Sira la iha abut kle’an» (179).

Bainhira ema husu ba Papa Francisco saida mak nia haree iha foin-sa’e sira, nia hatán: «Ha’u haree foin-sa’e mane ka feto ida ne’ebé buka nia nia dalan rasik, ne’ebé hakarak semu ho nia ain rua, ne’ebé enfrenta mundu no hateke ba orizonte ho matan nakonu ho futuru, nakonu ho esperansa no mós ho iluzaun sira. Foin-sa’e ida bá ho nia ain rua hanesan ema adultu sira, maibé la hanesan ema adultu sira, ne’ebé sira-nia ain hamutuk, foin-sa’e sira fali iha nafatin ain ida iha oin, prontu atu la’o, atu haksoit ba oin. Halai nafatin ba oin» (139). Juventude nia karakterístika mak esperansa no entuziazmu ba futuru, kapasidade atu foti risku sira no rekupera husi erru sira ne’ebé sira halo. Papa Francisco hakarak afirma juventude nia vitalidade no enkoraja foin-sa’e sira atu keta dezanima basá «la iha ema ne’ebé ida direitu atu na’ok imi-nia esperansa» (142).

Christus vivit, nune’e mós dokumentu sira seluk Sínodu nian, rekoñese dezafiu barak ne’ebé foin-sa’e sira enfrenta iha mundu ohin nian ne’ebé bele impede foin-sa’e sira atu iha espernsa. Foin-sa’e barak envolve iha funu sira, forsadu atu halai ka uza nu’udar seguransa ka treinu sira nu’udar soldadu iha konflitu sira. Iha fatin barak pobreza no privasaun sosiál iha impaktu aat liu ba foin-sa’e sira. Nu’udar Kreda ita «labele la tanis iha nia oan foin-sa’e sira nia trajedia ne’e nia oin» (75). Iha nasaun dezenvolvidu mós iha dezafiu barak ba foin-sa’e sira, inklui dezafiu sira husi ambiente dijitál foun no perigu sira husi konsumu esesivu no hiper-komersializasaun.

Presiza esperansa husi foin-sa’e sira atu enfrenta dezafiu sira-ne’e, maibé mós semtidu kona-ba ita mai husi ne’ebé, tau abut metin iha ita-nia kultura no istória. Tau abut ida-ne’e bele tulun ita Evita perigu sira ita-nia tempu nian, «ema ruma dehan ba imi atu haluha imi-nia istória, atu rejeita katuas-ferik sira-nia esperiénsia, atu despreza pasadu no hateke ba futuru ne’ebé nia propoin, ne’e la’ós dalan fasil liu atu dada imi atu nune’e imi halo de’it buat ne’ebé sira dehan ba imi? Ema ne’e presiza foin-sa’e sira la kle’an, abut-laek no deskonfia buat hotu, nune’e imi bele konfia de’it sira-nia promesa no submeter an ba sira-nia planu sira. Nune’e mak ideolojia sira ho kór oioin funsiona: sira estraga ka sobu diferensa sira hotu nune’e sira bele ukun lahó opozisaun» (181).

Presiza aprende buat barak iha relasionamentu sira entre jerasaun sira, buat ruma ne’ebé importante ba Papa Francisco nu’udar labarik ida liuhusi ninia relasaun forte ho ninia Avó-feto. Bainhira Papa Francisco ko’alia ba ema hotu ne’ebé halibur ba inísiu Sínodu nian, nia temi provérviu Ejitu nian: “Se la iha katuas-ferik iha ó-nia uma, sosa ida, tanba ó sei presiza ida!” Nia refere ba avó sira, ka sira ne’ebé iha sira-nia idade nu’udar “mahein memória nian”: «Ami avó-mane no avó-feto feto sira presiza forma koru ida. Ha’u haree katuas sira nu’udar koru permanente santuáriu espirituál boot ida nian, iha-ne’ebé orasaun súplika nian no knananuk hahí nian fó apoiu ba komunidade boot ne’ebé serbisu no luta iha kampu moris nian» (196).

Saida mak jerasaun katuas sira bele oferese? «Ami bele fó hanoin ba foin-sa’e ohin nian, ne’ebé iha ambisaun eroika no inseguransa kahur malu, katak moris lahó domin mak moris ne’ebé maran liu;  ami bele fó hatene ba foin-sa’e ne’ebé ta’uk katak bele manán ansiedade kona futuru; ami bele hanorin foin-sa’e sira, ne’ebé dala ruma fokus resin ba sira-nia an, katak iha ksolok liufali bainhira fó duke simu, no katak domin la hatudu ho liafuan de’it maibé ho hahalok mós» (197).

  • Ó hatene ka rekoñese ó-nia valór no abut sira?
  • “Oinsá ó valoriza relasionamentu ho avó sira ka relasionamentu entre jerasaun sira?

Haree ho modu partikulár ain-hakat sira: 73, 80, 137, 138, 139, 179 – 201.

 

Konkluzaun

Ho matadalan ida-ne’e ita hein, bele hamanas liután ita membru sira Família Saleziana nian, atu haree Kreda tuir Papa Francisco nia hakarak, atu haree foin-sa’e sira nu’udar Kreda nia prezente. Ita buka atu envolve ita-nia komunidade atu halo liña sira ne’ebé fó sai iha Christus Vivit konkretiza iha moris, iha realidade.

****

FMA TIN TATOLI Jan-Maiu 2019

Write a Comment

Your e-mail address will not be published.
Required fields are marked*