Komunidade edukativa harohan hamutuk

Komunidade edukativa harohan hamutuk

Venilale –  Loron 13 Juñu 2019, ne’ebe’ komemora loron Madre Mazzarello nian, ami  komunidade edukativa  halibur hamutuk fila fali atu halo selebrasaun hodi agradese Maromak  ba rikusoin /kbiit sira ne’ebé halo komunidade iha kapasidade atu bele  hatán ba dezafiu sira ohin loron nian no husu Ninia prezensa domin nian no mos husu Na’i atu perdua ba limitasaun sira  ne’ebé bloka ami atu hatan ba Nai nia misaun.

Selebrasaun ne’e hahú iha tuku 15:30 iha komunidade nia kapela.  Partesipantes sira mak mai husi komunidade edukativa: Irman sira nain 7 no mós ho formande sira nain 5 no leigu sira nain 8. Selebrasaun ida ne’e fahe ba momentu tolu: primeiru,  momentu atu husu  deskulpa ba fallansu sira hodi  laran metin ba  Na’i nia laran sadia no perdaun;  segundu, momentu atu rona Maromak nia Futar Lia kona ba Festa Kazamentu nian iha Cana ne’ebe dramatiza;  momentu, datoluk atu agradese Na’i Maromak ba rekursu sira  ne’ebe  iha atu bele hatan ba dezafiu sira.

Selebrasaun ne’e  hahu ho prosisaun hodi lori ba altar nia oin símbolu oin-oin, hanesan lilin, sana rai, globu, korente no dezafiu  sira. no mos Konstituisaun no Biblia.  Klima selebrasaun nian mak ksolok nakonu ho gratidaun.  Ho kantu Magnifikat nian, ami agradese Aman Maromak  ba kmanek hotu ne’ebe komunidade  Edukativa Maria Auxiliadora nian simu tan Na’i nia Domin  no mós husu atu akompaña servisu hotu ne’ebe  sei halo ba Maromak nia Reinu.

(Domingas Pereira)

Write a Comment

Your e-mail address will not be published.
Required fields are marked*