Iliomar – Jornada Nasionál Juventude Katólika, hahú ho juventude husi Dejukdil ne’ebé mai atu kolabora ho komisaun organizadora Iliomar nian semana ida antes. Husi loron 19 agostu, Kongresista sira husi Dioseze tolu hahú tama iha iliomar ho ksolok maske halo viajen naruk atu to’o, maibé kontempla tebes rai Iliomar nia furak, haluha kole hotu. Sira Ne’ebé rejistu totál hamutuk maizumenus 600 la sura padre no madre sira ne’ebé akompaña.

Loron dahuluk iha misa abertura Amu-Bispu Basílio do Nasimento fo ninia benvindos ba joven sira no hato’o ninia mehi atu Joven sira bele hasoru malu ho Kristu iha rai Iliomar. Hafoin iha lokraik hahu tuku 14.30, joven sira hetan formasaun husi OMK Jakarta kona-ba oinsa foin-sa’e sai protagonista iha Kreda no konvida foin-sa’e sira atu halo sira nia parte iha Kreda Timor. Se Kreda mak sarani ida-idak entaun joven ida-idak iha obrigasaun atu halo ninia parte iha Kreda. Kalan taka ho esperiénsia orasaun Taizé.

Loron segundu hahu ho tema Komunga Kristu moris hanesan Nia ne’ebe lori husi Amu-Bispu Basilio (bispo de Baucau). Hafoin kongresista sira fahe ba grupu 6 no kada grupu kompostu husi foin-sa’e nain 100. Sira simu formasaun ho tema ne’ebe la hanesan maibé hotu-hotu koalia koana-ba realidade foin-sa’e sira nian. Tema ne’ebe loloos padre João Boavida,SDB mak lori mak “Papel Foin-sa’e iha Kreda” maibé tan nia la marka prezensa tan ne Ir. Julia no Ir. Apolonia mak taka nia fatin. Iha ne’e ami foti husi ezortasaun Christus Vivit ne’ebé provoka tebes foin-sa’e sira tuir figura bíbliku ezemplár sira ne’ebé Amu-Papa propoin. Depoizde han meiodia ami kontinua fali ho reflesaun no sharing iha grupu, kongresista sira fahe tan ba grupu 7. Kada grupu reflete no fahe pergunta ida, ho reflesaun no sharing ida ne’e nudar resonánsia ba formasaun ne’ebé Amu-Bispu hatoo iha dadeer. Hare katak foin-s’ae sira entuziasta tebes.

Ikus mai loron segundu ne’e taka ho selebrasaun Eukaristia prezide husi Amu-Bispu. Iha omilia Bispu haklean fila fali katekeze kona-ba eukarista ne’ebe tuir nia importante tebes atu foin-sa’e sira komprende. Em jeral too loron ida ne’e buat hotu la’o diak, foin-sa’e sira haksolok no entuziasta atu hakle’an sira nia fiar. Ami mós haksolok tebes bele hela ho joven sira atu rona no halo esperiénsia fiar nian ho sira.

(Julia Marçal no Apolonia Golda)