Domingu II Tempu Páskua – Tinan A
Tema Domingu II Tempu Páskua nian
Liturjia domingu ne’e nian aprezenta mai ita komunidade Ema Foun sira nian ne’ebé moris husi Jezús nia krús no resurreisaun: Igreja. Nina misaun mak hatudu ba ema siramoris foun ne’ebe mosu husi resurreisaun.
Iha leitura dahuluk ita iha, “fotografia” komunidade sarani Jerusalém nian, trasu sira komunidade ideál nian: komunidade fraterna, preokupa atu koñese Jezús no ninia poposta salvasaun nian, ne’ebé halibur hamutuk atu hahí Na’i iha orasaun no Eukaristia, moris iha partilla, iha doasaun no servisu no fó sasin – ho jestu konkretu salvasaun ne’ebé Jezús mai propoin ba ema no ba mundu.
Iha Evanjellu ideia ida maka’as liu mak Jezús ne’ebé moris no moris-hi’as sai sentru komunidade sarani nian; komunidade estrutura an hale’u Nia no husi Nia mak komunidade simu moris ne’ebé anima nia no fó kbiit atu enfrenta difikuldade no persegisaun sira. Husi sorin seluk, iha moris komunidade nian (liturjia, domin, sasin) mak ema sira hetan prova katak Jezús moris hela.
Leitura daruak fó hanoin ba membru sira komunidade sarani nian katak identifikasaun ho Kristu – iha Ninia saran an tan domin ba Aman no ema sira – sei lori fiar-na’in sira ba moris-hi’as. Nune’e mak, fiar-na’in sira simu konvite atu tuir dalan ho esperansa maski hasoru difikuldade no mundu nia rai-kunan, ho matan fihir metin iha orizonte salvasaun definitiva nian.
