«Imi tau matan ba imi an rasik no bibi-luhan tomak». Paulo nia ministériu iha Éfeso no despedida ho katuas sira. Ne’e mak tema Audiénsia Jerál iha 4 Dezembru, iha Prasa S. Pedro.

“Evanjellu nia viajen iha mundu kontinua hodi la para no liu husi sidade Éfeso, hodi manifesta ninia signifikadu salvasaun nian.Ho Paulo nia knaar, ema na’in 12 simu batizmu iha Jezús nia naran no esperimenta Espíritu Santu ninia efuzaun ne’ebé haraik moris foun”, Amu-Papa salienta. “Milagre barak mak realiza liuhusi Apóstolu: moras sira hetan isin di’ak no ema ne’ebé diabu tama sai livre. Ida-ne’e akontese tanba dixípulu sai hanesan ninia Mestre no halo nia sai prezente hodi komunika ba maun-alin sira moris foun ne’ebé simu husi Nia”, Papa Francisco subliña.

Frakeza arte májika sira-nian

Tuir Papa Francisco, “Maromak nia kbiit ne’ebé manifesta iha Éfeso, hasai máskara husi ema ne’ebé hakarak uza Jezús nia naran atu halo ezorsizmu sira, maibé lahó autoridade espirituál atu halo, no hatudu sai arte májika nia frakeza sira, ne’ebé ema sira tuir Kristu abandona”. Éfeso mak sidade ida famoza ba prátika majia nian. “S. Lucas subliña inkompatibilidade fé iha Kristu no majia”.

“Se ó hili Kristu ó labele halai ba matan-dook: fiar mak abandonu konfiante iha Maromak ne’ebé bele konfia nia liman, ne’ebé hatudu la’ós liuhusi prátika nakukun nian, maibé liuhusi revelasaun no domin gratuitu.”

“Karik imi balun bele dehan: Ah, sin, istória majia ne’e antiga. Ohin, ho sivilizasaun sarani, buat ne’e la akontese. Imi matan moris bá! Ha’u husu ba imi: imi na’in hira mak ba tuir ‘tarot’, imi na’in hira mak ba buka ema lee imi-nia liman laran no adiviña liuhusi  karta joga? Ohin loron, iha sidade boboot sira, sarani pratikante sira sei buka buat sira-ne’e”.

“Maibé, se ó fiar iha Jezús Kristu, tanba sá ó ba buka matan-dook, siik-door, ema sira ne’e hotu? Halo favór: majia la’ós sarani. Buat sira ne’ebé halo atu si’ik futuru ka si’ik buat barak ka muda situasaun moris nian la’ós sarani. Kristu nia grasa haraik buat hotu ba ó: harohan no konfia iha Na’i”.

Difuzaun Evanjellu nian iha Éfeso prejudika komérisu badaen osan-mean nian ne’ebé halo estátua maromak-feto Ártemis, hodi halo prátika relijioza ida nu’udar negósiu tebes ida. “Haree katak atividade ne’ebé fó osan baraak ne’e menus, badaen osan-mean sira organiza revolta kontra Paulo, no akuza sarani sira nu’udar ema sira ne’ebé halo krize ba kategoria artezaun sira, santuáriu maromak-feto Ártemis no kultu ba maromak-feto ne’e”, Amu-Papa hateten.

Iha parte ikus ninia katekeze, Amu-Papa husu atu “bibi-atan” sira hein komunidade: “imi matan moris ba an rasik no ba bibi sira: no ida-ne’e mak bibi-atan nia serbisu. Bibi-atan tenke hein, halo vijília, presbíteru sira tenke hein. Bispu sira, Papa tenke hein. Katak: matan moris atu proteje bibi sira, no matan moris ba an rasik, ezamina konxiénsia no haree oinsá nia kumpri devér hein nian”.