Maromak nia Oan sai ema atu halo ita sai Maromak nia oan sira

Maromak nia Oan sai ema atu halo ita sai Maromak nia oan sira

Maun no biin-alin sira, bondia!

 

Iha domingu daruak Tempu Natál nian, leitura bíblika sira tulun ita atu haluan hateken, atu iha konxiénsia nakonu kona-ba signifikadu Jezús nia moris nian.

Evanjellu, ho prólogu S. João nian, hatudu mai ita novidade xokante: Liafuan rohan-laek, Maromak nia Oan, «hola isin» (v. 14). Nia la mai de’it horik iha povu nia leet, maibé nia sai ida ho povu, ida hanesan ita!! Depoizde akontesimentu ida-ne’e, atu orienta ita-nia moris ita la iha de’it lei ida, instituisaun ida, maibé Pessoa ida, Pessoa divina ida, Jezús, ne’ebé orienta ita-nia moris, halo ita la’o iha lurón tanba Nia mak la’o uluk.

S.Paulo hahí Maromak ba ninia palnu domin nian realiza iha Jezús Kristu (kf. Ef 1,3-6.15-18). Iha planu ida-ne’e ita ida-idak hetan ita-nia vokasaun fundamental rasik. Sá loos? S.Paulo dehan nune’e: iha Nia hanoin, Maromak destina ita atu sai ninia oan sira hodi Jezús Kristu nia hahalok. Maromak nia Oan sai ema atu halo ita sai Maromak nia oan sira. Tanba ne’e Oan rohan-laek hola isin: atu introdús ita iha relasaun filiál ho Aman.

Nune’e, maun no biin-alin sira, enkuantu ita kontinua kontempla sinál admiravel Prezépiu nian, Liturjia ohin nian dehan mai ita katak Kristu nia Evanjellu mak revelasaun nakonu Maromak nia planu nian. Maromak nia planu ba ema no ba mundu. Ne’e mak mensajen ida no tempu hanesan simples no boot liu, ne’ebé dudu ita atu husu ba an rasik: sá loos projetu konkretu ne’ebé Na’i tau iha ha’u, hodi atualiza dala ida tan ninia moris iha ita-nia leet?

Apóstolu Paulo mak sujere ninia resposta: «[Maromak] hili ita […] atu sai santu no imakuladu iha ninia oin iha karidade» (v. 4). Ida-ne’e mak signifikadu Natál nian. Se Na’i kontinua atu mai iha ita leet, se kontinua haraik prezente ninia Liafuan nian, ne’e tanba atu ita ita ida-idak bele hatán ba bolun ida-ne’e: sai santu iha domin. Santidade katak pertense ba Maromak, katak komuñaun ho Nia, transparénsia ninia laran-di’ak ne’ebé la nahas. Santidade katak rai di’ak prezente ne’ebé Maromak fó mai ita. Ida-ne’e de’it: rai di’ak gratuidade. Ida-ne’e mak dehan sai santu. Tanba ne’e, ema ne’ebé simu santidade nu’udar prezente grasa nian, labele la tradús iha asaun konkreta sira iha moris loroloron, iha enkontru ho ema seluk. Karidade ida-ne’e, mizerikórdia ba maluk, lalenok Maromak nia domin nian, tempu hanesan purifika ita-nia fuan no prepara ita ba perdaun, halo ita sai loron ba loron “imakuladu”. Maibé imakuladu la’ós iha sentidu katak ha’u hasai foer ida: imakuladu iha sentidu katak Maromak tama ihaita, don, Maromak nia gratuidade tama iha ita no ita rai di’ak no fó ba ema seluk.

Atu Virjen Maria tulun ita simu ho ksolok no gratidaun Maromak nia planu domin nian realiza iha Jezús Kristu.

Tags: epifania