Laga – Komunidade Laura Vicuna Laga hanesan tinan-tinan selebra festa Laura Vicuna dala rua. Dahuluk iha loron 22 Janeiro ho estudantes sira hotu iha Laga laran no daruak modifika tuir aman inan orfaun sira nian iha loron sabado antes ka depoizde loron 22. Iha tinan ida ne’e selebrasaun ho estudante sira selebra iha komunidade ho estudantes sira husi Eskola Dom Bosco Tomagua husi eskola basico too iha secundario. Maski fatin iha komunidade limitadu maibé komunidade usa koridor sira hotu atu estudante no profesores sira hotu bele tur hodi partesipa ho diak Santa Misa. Misa hahu tuku 8.30 dader. Depoizde misa estudante sira hotu kontinua sira nia lisaun. Iha tempu rekreio Irman sira hamutuk prepara merenda donut no bebida ale-ale ba sira ida-idak. Estudante sira besik atus lima (500).

Iha loron 25, loron ne’ebe komunidade dedika ba Festa Mahein Orfanatu nian hamutuk ho aman inan orfaun sira nian. Tinan ida ne’e ami agradese ba presenza Madre Alma Castagna, ninia presenza iha ami nia le’et hodi fo konferensia formasaun ba aman inan sira husi orfaun nain 104 nia familia. Iha formasaun ne’e Madre Provincial koalia konaba familia mak kreda domestika. Hodi halo ligasaun ba Estreia Reitor  Nor 2017 nian “Ita mak Familia”. Konferensia furak tebes hodi sai buka’e espiritual nian ba familia sira ne’e. iha misa Amu Paroko Laga, Pe. Rui Gomes, dehan Laura vicuna nia moris bele sai hanesan ba ita balun iha tempu ohin nian. Maski nia sei labarik ida deit maibe hatene hanoin boot hodi konverte nia inan ba dalan Maromak nian. Nune’e ohin mos Santa Kreda selebra Festa Konversaun saun Paul nian ita mos hare ba konversaun ne’ebe Laura lori ba ema seluk. Ezemplu barak iha Kreda ne’ebe tulun ema seluk atu nakfilak an hanesan mos Santa Monica nia orasaun konverte nia oan mane Santo Agostinho muda ninia moris no hahalok. Selebra Festa Laura Vicuna tulun ita atu hili mos dalan konversaun loroloron nian. Depoizde misa grupu Asosiasaun Laura Vicuna prepara jogus divertente ruma baa man inan sira hafoin ami fahe malu. Agradese tebes ba kolaborasaun hamutuk entre Madre sira no nukleu animador Komunidade Edukativa ninia apoio ba programa festa mahein 2020 nian.

(Angelita Gomes)