Laga – Ohin loron 21 fevereiro, nu’udar komunidade SDB no FMA Laga; realiza formasaun dahuluk tinan 2020 nian ba animador zonal; Laga no Quelicai iha salaun EBCC Dom Bosco Laga, husi irmán Teresinha de Assunção Belo, FMA. Formasaun hahú iha iha tuku 16.00 OTL. Hahu ho Bemvinda, animasaun no orasaun loken. Hafoin kontinua ho formasaun sesaun dahuluk ho tema, “Dom Bosco nia polítika Ami Aman”. Aprezenta konaba, Dom Bosco nia simpatia no vontade hodi kontaktu ho foinsa’e sira, Dom Bosco ne’ebe susesu iha nia misaun tanba nia polítika Ami Aman mak “halo ita-nia reino too mai iha rai, habelar iha rai, atu ema bele sente liután, sai moris liután, kbiit maka’as liután no gloriozu: Adveniat regnum tuum! Politika ida-ne’ebé la’os atu buka kadeira maibé halo diak ba foinsa’e sira hodi salva sira nia klamar. Politika atu forma Sidadaun sira-ne’ebé onestu, atu tulun foinsa’e sira kria ordem iha sosiadade, sai hakmatek no haki’ak dame. Hotu tiha fó tempu ba reflesaun 10 minutus. Ho espontanea animador ne’ebé pronto fahe iha asembleia. Sesaun daruak; Asisti video estreia Reitor Maior 2020 nian. Remata video, kontinua ho animasaun, hafoin foto hamutuk, merenda no fahe-malu. Agora saida mak animador dehan? Lian animador sira-nian:

“Reflesaun badak ne’ebé ami rona iha formasaun zonal 2020 mak; Ita nu’udar animadór tenke iha komitmentu ka propozitu ida. Iha formasaun ne’e ami haree figura DB ne’ebé hatudu nia domin ba foinsa’e sira, dada labarik sira besik liután ba Jesus. DB nia misssaun atu manán foin-sa’e sira mak nia kaer metiin nia “politika Ami Aman”. Ami sente kontente no haksolok bainhira ami rona liafuan ne’ebé ami simu atu ami mós bele la’o ba dalan loos no dada mós maluk foinsáe sira besik liután ba Kristu. (grupu animador Buiguira)

“Tuir ami-nia hanoin no haree kona-ba formasaun zonal tinan 2020 ne’ebé ko’alia kona-ba DB nia politika Ami Aman no haree estreia Reitor Maior nian kona-ba oinsá lori labarik sira besik liután ba Na’I Jesus Kristu. Ho DB nia attitude sira-ne’e halo ami animador sira loke ami-nia hanoin oinsá atu gia labarik sira no lori sira ba dalan santidade nian. Ho formasaun hirak ne’e halo ami sente kontente no agradese tebes no aumenta liután ami-nia kompresaun. (grupu animador Samalari).

“DB nia Politika  mak  Ami Aman”. Tuir ami haree katak  tema ida-ne’e ba foinsa’e sira hotu espesifiku ba animador sira, antes atu ba iha sosiedade, labele lori ita nia an mesak maibe lori ho “Ami Aman”.  (Grupu animador Quelicai).

“DB bele dada joven sira hakbesik ba Igreja no sai diak liu, tanba liuhusi nia politika Ami Aman, hahalok ne’e mós hatudu ba ami animador sira katak molok halo buat ida keta haluha ho orasaun, tan buat hotu ne’ebé ita hetan ne’e mai husi Aman Maromak”. (grupu Animador Tequinomata).

“Ami agradese tebes ba formasaun zonal bele gia ami animador sira ida-idak atu bele sai animador ne’ebe diak liutan hodi anima no lori labarik no joven ne’ebé ami hasoru iha fatin oratorio nian hodi lori klamar barak ba Kristo no lori Kristo ba sira ida-idak. (Grupu animador Binagua).

“DB nia politika Ami Aman ne’e fó hanooin mai ami atu hala’o didiak ami-nia knar nu’udar animador. Katak ami tenke sai ezemplu di’ak iha oratorio, hadomi labarik sira, konvida sira atu kuinese Jesus no hanorin Liafuan di’ak ba sira”. (grupu animador Nunira).

Hotu-hotu kontente no sente satisfas ho formasaun ne’e, maske barak husi sira nu’udar animador foun. Animador hamutuk na’in 33; husi sira zona Quelicai 4, volontaria 4, no seluk 25. Fini di’ak iha importante tau-matan nafatin.

(Anita Freitas, FMA)