Kriatividade iha festa karnavál molok Kuarezma
Venilale – Komunidade Santa Maria Mazzarello iha kalan molok tama Kuarezma, tuir tradisaun saleziana, halo festa karnavál. Festa ne’e sai oportunidade atu haksolok, hasai kriatividade ne’ebé ida-idak iha atu halo maluk sira haksolok.
Ba tinan ne’e, ami-nia karnavál nia layout bazeia ba fábula oioin ne’ebé nafatin iha ninia hanorin atu moris tuir. Grupu sira fahe tuir turma husi tinan dahuluk to’o tinan datoluk no Irmán sira. Istória sira kona-ba Rapunzel, Cinderella, Bawang Putih/Merah, Upin, Prinseza ne’ebé toba, nst. FMA sira nia istória kona-ba “Fini Kaori nian”, ne’ebé ko’alia kona-ba liurai-oan ida husi rai Xina, ne’ebé uza estratéjia atu hili feto-raan ida ne’ebé bele sai ninia kaben no mós liurai-feto. Liurai-oan ne’e fahe fini estéril ba feto-raan sira ne’ebé mai iha palásiu tanba hakarak sai liurai nia feen, Entre sira hotu, iha feto-raan ida de’it mak manán liurai nia fuan tanba nia la bosok liurai ho ai-funan, maibé lori duni ninia vazu ne’ebé nia tau matan ba fulan neen maski fini ida la moris.
Hotu tiha festa, Ir Jacinta fó buona-notte hodi aprezenta Papa Francisco nia mensajen ba Kuarezma 2020: “Ami husu imi hodi kbiit iha Kristu nia naran: hadame malu ho Maromak bá” (2Cor 5,20). Iha mensajen ne’e, Amu-Papa dehan katak urjente konversaun ne’ebé ninia fundamentu mak Kristu nia mistériu paskál atu lori Maromak nia mizerikórdia. Amu-Papa konvida sarani sira liuliu atu moris partilla rikusoin nian liuhusi esmola ho maun-alin sira ne’ebé presiza. Tanba ne’e mak iha Kuarezma nia laran Amu-Papa promove enkontru ida ho ekonomista foin-sa’e sira iha Assisi, Itália. Amu-Papa dehan: “Partilla iha karidade halo ema sai ema liután; akumula iha risku atu halo nia sai aat, hodi taka an iha egoízmu rasik”.
(Comsoc FMATIN)
