Belun doben sira, bonoite!

Kalan ne’e ha’u iha posibilidade atu tama iha imi-nia uma sira ho modu lahanesan baibain nian. Se imi permite, ha’u hakarak ko’alia ho imi ba momentu ruma, iha períodu difikuldade no sofrimentu nian ida-ne’e. Ha’u imajina imi iha imi-nia família sira, enkuantu hala’o moris la’ós baibain nian atu evita kontájiu. Ha’u hanoin ba labarik no foin-sa’e sira nia isin-moris, hodi labele sai husi uma, frekuenta eskola, halo sira-nia moris. Iha ha’u-nia fuan ha’u iha família hotu, liuliu sira ne’ebé iha doben ida ne’ebé moras ka infelizmente halo lutu tanba coronavirus ka tanba kauza seluk. Iha loron sira ne’e ha’u hanoin beibeik ba ema sira ne’ebé mesak, tan ne’e difisil liután enfrenta momentu sira-ne’e. Liuliu ha’u hanoin ba katuas-ferik sira, ne’ebé ha’u hadomi liu.

Ha’u labele haluha ema ne’ebé moras coronavirus, ema sira baixa iha ospitál sira. Ha’u iha prezente ema ne’ebé espoin nia an nia jenerozidade atu kura pandemia ne’e ka atu garante servisu esensiál sira ba sosiedade. Asua’in hira, loroloron nian, oras hotu nian! Ha’u hanoin ema sira ne’ebé moris ekonomia apertada no preokupa ba serbisu. Hanoin ida bá mós ba dadur sira iha prizaun, ne’ebé sira nia terus aumenta ho ta’uk ba epidemia, ba sira no sira nia maluk; ha’u hanoin ema sira la ne’ebé la iha hela-fatin, ne’ebé la iha uma ida atu proteje sira.

Ne’e mak momentu difisil ida ba hotu. Ba ema barak difisil liu. Papa hatene no, ho liafuan sira ne’e, nia hakarak dehan ba ema hotu ninia prosimidade no ninia afetu. Ita buka, se bele, utiliza didi’ak tempu ida-ne’e: ita sai laran-luak; tulun ema ne’ebé iha nesesidade iha ita-nia sorin-sorin; ita buka, karik liuhusi telefone ka social, sira ne’ebé mesak liu; ita harohan ba Na’i ba ema sira ne’ebé hetan provasaun iha Itália no iha mundu. Maski ita izloladu, pensamentu no espíritu bele bá dook ho kriatividade domin nian. Ida-ne’e mak presiza ohin: kriatividade domin nian.

Ita selebra ho modu la baibain Semana Santa, ne’ebé manifesta no halo rezumu mensajen Evanjellu nian, Maromak nia domin lahó limite. No iha silénsiu iha ita-nia sidade sira, sei Evanjellu Páskua nian sei nalian. Apóstolu Paulo dehan: «No nia mate ba ema hotu, atu sira ne’ebé moris la moris on aba an rasik, maibé ba ida ne’ebé mate no moris hi’as ba sira» (2 Cor 5,15). Iha Jezús morishi’as, moris manán mate. Fiar paskál ida-ne’e  haburas ita-nia esperansa. Ha’u hakarak partilla ho imi kalan ida-ne’e. Ne’e mak esperansa ma tempu ida di’ak liu, iha-ne’ebé ita sai di’ak liu, finalmente livre husi att no pandemia ida-ne’e. Ne’e mak esperansa ida: esperansa ne’ebé la ilude; la’ós iluzaun, esperansa ida.

Hamutuk iha domin no iha pasiénsia, ita bele prepara iha loron hirak ne’e tempu ida di’ak liu. Ha’u agradese tan imi permite ha’u tama iha imi-nia uma sira. Imi halo jestu ida ternura nian ba ida-ne’ebé sofre, ba labarik sira, ba katuas-ferik sira. Dehan ba sira katak Papa besik no harohan, atu Na’i liberta lalais ita hotu husi aat. No imi, harohan mai ha’u. Buona cena. A presto!