Iha Vijília Pentekostes ita husu ba Espíritu Santu atu haraik nia don sira iha situasaun foun mundu nian.

Venilale – FMA komunidade Madre Mazzarello prepara Vijília Pentekostes nian, ne’ebé hetan apoiu husi Padre Pároku no foin-sa’e sira grupu “corona”, foin-sa’e sira Venilale nian. Iha tempu ne’ebé ita moris pandemia ne’ebé lori situasaun foun ba mundu, ita presiza husu ba Espíritu Santu, oinsá ita mós tenke iha atitude foun iha mai husi hanoin foun, modu, matan foun atu hateke ba mundu ho ninia kriatura sira, hahalok foun  hasoru maluk sira no Rai ne’ebé  Maromak haraik mai ema sira.

Iha momentu Vijília ita rona Maromak nia Liafuan ne’ebé fó hanoin mai ita katak Maromak sempre prezente iha mundu husik kedas nia hahú to’o ohin loron. Ninia prezensa fó moris ba buat mamuk, fó fali espíritu ba ruin maran sira, halo moris Adaun foun ne’ebé salva Adaun tuan husi mate.

Amu pároku iha omilia, fó hanoin ba signifikadu Pentekostes ba judeu sira no ba sarani sira, loron limanulu atu hanoin Maromak nia grasa salvasaun nian atu agradese ba ai-fuan sira Rai nian, grasa salva husi bee dilúviu, iha dezertu no ba sarani sira salvasaun paskál husi Kristu.

Iha Vijília ita mós halo memória ba Sakramentu sira, ne’ebé Kristu mak institui atu kontinua ninia prezensa salvasaun nian liuhusi Espíritu: Espíritu Batizmu nian, atu hadi’ak Kristu nia imajen iha ita; Espíritu Krisma nian, atu konfirma Kreda iha Na’i nia domin; Espíritu Eukaristia nian, ne’ebé halo ita metin iha unidade; Espíritu Peniténsia nian, ne’ebé konverte ita-nia fuan; Espíritu Mina-Sarani nian, ne’ebé tau iha ita fini moris-hi’as abanbairua nian; Espíritu saserdósiu nian, ne’ebé  halo ita sai adora-Na’in loloos Aman nian; no Espíritu tali santu nian, ne’ebé santifika Kreda, Kristu nia kaben.

Iha vijília ita mós halo memória no hanoin Santa Maria, Virjen Espíritu nian, feto vijilante atu hein no feto orasaun konstante nian, liurai-feto Apóstolu sira-nian no Inan konsellu di’ak nian hamutuk ho ita, atu husu ba Aman no Oan atu haruka Espíritu Santu tun mai Kreda, mai umanidade, mai kriasaun.

(JG)