Solenidade Asunsaun Maria Virjen nian. Buat ne’ebé presiza hatene

Solenidade Asunsaun Maria Virjen nian. Buat ne’ebé presiza hatene

Loron 15 Agostu mak festa Asunsaun Virjen Maria nian ba lalehan. Hanesan Jezús, Maromak halo nia moris-hi’as ba moris rohan-laek tanba nia mak Jezús, Maromak nia Oan-Mane Mesak nia Inan, no tanba ne’e sala-laek.  Maria mak “primeira”, depoizde Kristu, atu esperimenta moris-hi’as, no nia mak antisipasaun isin ninia moris-hi’as ne’ebé ema hotu sei esperimenta depoizde Juízu finál. Amu-Papa Pio XII mak iha loron 1 Novembru 1950 proklama dogma fiar Asunsaun Na’i-Feto nian. Iha loron hanesan, Kreda Ortodoksa selebra loron “Dormisaun” (Toba) Virjen Maria nian.

“Dormitio Virginis” no Asunsaun, iha Oriente no iha Osidente, mak festa mariana antiga liu. Papa Pio XII iha loron 1 Novembru 1950, Tinan Santu, ho modu solene proklama ba Kreda Katólika tomak, dogma fiar nian iha Maria Virjen nia Asunsaun ba lalehan ho Konstituisaun apostólika Munificentissimus Deus”.

Kreda Ortodoksa no Kreda apostólika Arménia nian selebra Maria nia “Dormisaun” iha 15 Agostu.

Saida mak ita selebra iha solenidade ida-ne’e?

Na’i-Feto Imakulada, ne’ebé la iha sala orijinál, depoizde ninia moris iha rai, Maromak hasae ba lalehan, katak Na’i simu nia klamar no isin iha glória lalehan, foti sa’e nia nu’udar liurai-feto universu nian, atu nia sai hanesan ho ninia Oan-Mane, Na’i ukun-na’in sira-nia no manan-na’in salan no mate nian (Lumen gentium, 59). Virjen Asunta, tuir Misal Romanu, mak fuan dahuluk Kreda lalehan nian no sinál konsolasaun no esperansa metin ba kreda la’o-rai. Ida-ne’e tanba Maria nia Asunsaun mak antisipasaun ba moris-hi’as isin nian, ne’ebé ba ema seluk sei akontese iha tempu nia rohan, ho Juízu universál. Ida-ne’e mak solenidade ne’ebé, korresponde ho santu sira seluk nia loron ‘natalis’ (mate),  ne’e mak loron festa prinsipál Na’i-Feto nian.

Loron 15 Agostu, fó hanoin ba dedikasaun uma-kreda boot nian ida ba Maria iha Jerusalém.

Sá loos diferensa entre “Asunsaun” no “Dormisaun”?

Ninia diferensa prinsipál mak Asunsaun la nesesariamente implika mate, maibé la esklui mós. Dormisaun dehan mate.

Sá de’it fonte sira?

Hakerek dahuluk ita bele fiar ne’ebé haktuir Maria Virjen nia Asunsaun iha Lalehan, hanesan tradisaun orál hatutan, iha asinatura Bispu S. Gregório de Tours ( 538 ca.- 594), istóriku no ajiógrafu: «Ikusmai, bainhira, beata Virjen remata ninia moris iha rai, Na’i atu bolu daudaun nian husi mundu ne’e, apóstolu hotu, mai husi rejiaun oioin, halibur iha ninia uma. Bainhira sira sente katak nia atu husik mundu, siha halo velada ho nia. Maibé, Na’i mai ho ninia nju sira no, foti ninia klamar, entrega ba Arkanju Miguel no nia hadook an husi sira. Iha dadeersaan nakukun apóstolu sira foti nia isin iha kama leten, hatoba iha rate ida no rai didi’ak, hodi hein Na’i ne’ebé sei mai. No ba daruak, Na’i aprezenta an ba sira, fó orden atu foti isin sagradu ne’e no lori ba Lalehan».

Sá loos ninia signifikadu teolójiku?

Doutór Kreda nian, S. João Damasceno (676 ca.- 749) hakerek: «Konvein atu nia ne’ebé iha tur-ahi konserva tomak ninia virjindade husi korrupsaun isin nian, konserva tomak ninia isin depoizde mate. Konvein atu ida ne’ebé lori iha ninia knotak Kriadór halo an kosok-oan, hela iha horik-fatin Maromak nian. Konvein atu Maromak nia Espoza tama iha uma lalehan. Konvein atu nia ne’ebé haree ninia oan rasik iha Krús, hodi simu ninia iha isin terus ne’ebé nia la esperimenta iha tur-ahi, kontempla Nia hatur an iha Aman nia kuana. Konvein atu Maromak nia Inan soi buat ne’ebé ninian tanba ninia oan no simu onra hsu kriatura hotu nu’udar Inan no Maromak nia atan». Maromak nia Inan, ne’ebé la kona korrupsaun husi salan orijinál, nia isin sala-laek mós la kona korrupsaun, Nia ne’ebé fó fatin ba Liafuan tenke tama iha Reinu Lalehan ho nia isin glória nian.

Saida mak “Padre” sira Kreda nian dehan?

S. Germano de Costantinopla (635 ca.-733), ne’ebé hetan konsiderasaun nu’udar tutun marilojia patristíka nian, afavór ba Asunsaun no ba razaun prinsipál tolu: nia tau iha Jezús nia ibun, liafuan sira-ne’e: «Mai ho laran ba nia ne’ebé ó hahoris. Ho devér oan nian ha’u hakarak haksolok ó; ha’u hakarak selu horik-fatin iha ó-nia knotak inan nian, saláriu fó susu nian, kolen edukasaun nian; ha’u hakarak fó serteza ba ó-nia fuan. Oh Inan, ó ne’ebé soi ha’u nu’udar oan mesak, hili atu horik ho ha’u bá». Razaun seluk mai husi Maria nia pureza no integridade totál. Datoluk: papél intersesaun no mediasaun nian ne’ebé Virjen simu bolun atu hala’o iha Oan-Mane nia oin afavór ba ema sira.

Ita lee tan iha ninia hakerek Omilia I kona-ba Dormisaun, ne’ebé nia foti husi S. João, Arsebispu Tessalónika nian (entre 610 no 649 ca.) no husi testu ida husi ida ikus nian ne’e, ne’ebé hakerek detalle sira orijen festa Asunsaun nian orjien, ho serteza iha Kreda Orientál iha sékulu dahuluk sira: «Nu’udar umanu (ó-nia isin) nakfilak an atu adapta an ba moris aas imortalidade nian; maski nune’e nia mantein tomak no gloriozu liu, ho perfeita vitalidade no la hela iha duku (mate) nia ukun, vazu ne’ebé kontein Maromak no templu moris divindade santíssima Oan Mane-Mesak nian». Hafoin kontinua: «Ó, nu’udar hakerek, furak no ó-nia isin virjinál santu tomak, kastu tomak, Maromak nia horik-fatin tomak: tan ne’e la hatene saida mak sai rai-rahun. Defaktu, hanesan oan ida buka no hakarak ninia inan rasik, no inan haksolok atu moris ho oan,  nune’e justu teses atu ó mós, ne’ebé soi fuan ida nakonu ho domin inan nian ba ó-nia Oan no Maromak, fila hikas ba nia; no konvein duni atu Maromak, ne’ebé iha sentimentu domin nian ne’ebé ema ida koko ba inan ida, halo ó partisipa iha komuñaun moris nian ho nia an rasik».

Tags: Asunsaun