Papa Francisco iha Angelus 20 Setembru 2020

Maun no biin-alin sira, bondia!

Pájina evanjélika ohin nian (kf Mt 20,1-16) haktuir ai-knanoik traballadór sira ne’ebé patraun to’os-uvas nian bolu ba serbisu loron ida nian. Liuhusi istória ne’e, Jezús hatudu Maromak nia modu atua ne’ebé halo hakfodak, reprezenta husi atitude rua patraun nian: bolun  no rekompensa.

Uluknanai bolun. To’os-uvas ida nia na’in sai dala lima iha lurón no bolu atu serbisu ba nia: iha tuku neen, tuku sia, tuku sanulu-resin-rua, tuku tolu no tuku lima loraik. Komovente ilas patraun ne’e nian ne’ebé sai dala barak iha lurón atu buka traballadór sira ba nia to’os-uvas. Patraun ne’e reprezenta Maromak ne’ebé bolu ema hotu  no nafatin, iha oras naran de’it. Maromak atua nune’e: kontinua bolu ema naran de’it, iha oras naran de’it, atu konvida serbisu iha ninia Reinu. Ida-ne’e mak Maromak nia estilu, ne’ebé ita simu bolu atu simu no banati tuir. Nia la taka an iha ninia mundu, maibé “sai”: Maromak “sai nafatin, buka ita; nia sulan an: Maromak sai. Nia sai kontinuamente atu buka ma sira, tanba nia lakohi atu ema ida eskluidu husi ninia hanoin domin nian.

Ita-nia komunidade sira mós simu bolun atu sai husi tipu oioin “limite” nian ne’ebé iha, atu oferese ba ema hotu liiafuan salvasaun nian ne’ebé Jezús lori mai. Ne’e katak loke ba orizonte moris nian neebé oferese esperansa ba ema sira ne’ebé paradu hela iha perfieria ezistensiál sira no seidauk esperimenta, ka lakon, forsa no naroman enkontru nian ho Kristu. Kreda tenek sai hanesan Maromak: nafatin sai; no bainhira Kreda la sai, nia moras ho moras barak oioin ne’ebé ita iha, iha Kreda. No tanba sá moras sira-ne’e iha Kreda? Tanba nia la sai. Loos duni katak bainhira ema ida sai nia iha perigu asidente nian. Maibé si’ak liu Kreda ida kanek tan asidente, tanba sai, tan haklaken Evanjellu, duké Kreda ida moras tanba sulan an. Maromak sai nafatin, tanba nia mak Aman, tanba Nia hadomi. Kreda tenek halo hanesan: nafatin sai.

Atitude daruak patraun nian, ne’ebé reprezenta ida Maromak nian mak ninia modu atu rekompensa traballadór sira. Oinsá Maromak selu? Patraun kokonrda malu ba «osan ida» (v. 2) ho traballadór dahuluk sira nia foti iha dadeer. Ba sira ne’ebé mai tan nia dehan: «Ha’u sei fó ba imi buat ne’ebé justu» (v. 4). Remata loron, patraun tua-uvas nian fó orden atu selu hanesan ba hotu, katak osan ida. Sira ne’ebé serbisu husi dadeer hirus no lamenta kontra patraun, maibé nia insiste: nia hakarak fó rekompensa másimu ba hotu: nia la hela iha pagamentu sorin de’it, Nia selu tomak. No iha ne’e ita komprende katak Jezús la ko’alia kona-ba serbisu no saláriu justu, maibé iha-ne’e iha problema seluk, Maromak nia Reinu nian no Aman lalehan ninia laran-di’ak, ne’ebé sai kontinuamente atu konvida no selu másimu ba hotu.

Defaktu Maromak ninia hahalok nune’e duni: Nia la haree ba tempu no rezultadu sira, maibé ba disponibilidade, nia haree ba jenerozidade ne’ebé ita tau iha ninia servisu. Ninia hahalok liután justu nian, iha sentidu katak nia hakat liu justisa no manifesta iha Grasa. Buat hotu mak Grasa. Ita-nia santidade mak Grasa. Hodi haraik Grasa mai ita, Nia hasuli mai ita naresin husi buat ne’ebé ita merese. Entaun, ema ne’ebé halo rasiosíniu ho lójika umana, katak tuir méritu sira nia manán ho ninia abilidade, husi dahuluk sei sai ikus. “Maibé, ha’u serbisu maka’as, ha’u halo buat barak iha Kreda, ha’u tulun barak, no selu ha’u hanesan de’it ho ida ne’ebé to’o ikus”. Ita hanoin sé mak santu dahuluk kanoniza iha Kreda: Na’ok-teen Di’ak. Nia ‘na’ok” Lalehan iha momentu ikus nia moris nian: ida-ne’e Grasa, Maromak nune’e duni. Ho ita hotu mós. Maibé, ema ne’ebé buka hanoin ba ninia méritu sira, hasoru frakasu; ema ne’ebé laran metin ho haraik-an iha Aman nia mizerikórdia, husi ikus – hanesan Na’ok-teen Di’ak – sai uluk (kf v. 16).

Maria Santíssima tulun ita au sente loroloron ksolok no surpreza simu bolun nian husi Maromak atu serbisu ba Nia, iha ninia kampu, katak mundu, iha ninia to’os-uvas katak Kreda. No atu iha nu’udar rekompensa ida mesak, ninia domin, amizade ho Jezús.