MANDATU MISIONÁRIU BA MISIONÁRIA FOUN

Fuiloro – Loron  21 Novembru mak loron ne’ebé Kreda selebra aprezentasaun Maria Virjen nian, iha-ne’ebé Na’i-Feto nia Inan-Aman lori nia sei ki’ik-oan ba aprezenta ba Na’i iha Templu.

Loron ne’e mós sai nu’udar loron espesiál tanba Irmán Albina do Carmo, FMA mós aprezenta an ba Maromak atu sai misionária Ad Gentes. Ohin, nia simu krús Misionária nian  husi Superiora Inspetora TIN, Madre Alma Castagna, FMA iha Kapela Koléjiu Beata Maddalena Morano Fuiloro, Lospalos. Krús ne’ebé ohin simu simbolikamente husi Inspetoria TIN maibé krús ne’ebé sei simu loloos, sei simu iha Torino Italia hamutuk ho nia maluk  Irmán 11 husi nasaun oin-oin.

Serimónia Simu Krús Misionária nian hahú ho Santa Misa ne’ebé selebra husi Padre Provinsiál, Padre Apolinario Maria Neto, SDB, hamutuk ho Padre Albino Fernandes, SDB.

Iha omilia padre hateten katak:  uluknanain Ita agradese Maromak ba Irmán Albina nia vokasaun nu’udar Saleziana no vokasaun nu’udar Misionária tan fó resposta ida ne’be furak teb-tebes ba Santa Kreda, liuliu konvite iha Institutu Filhas de Maria Auxiliadora nian. Hanesan família entrega ba kreda momentu ne’ebé hakbesik hodi simu Sakramentu Batizmu, iha momentu ne’ebá simu naran sarani, naran fiar nian atu sai Jezús nia dixípula, atu haklaken, hasantu no ukun.

Mensajen ne’e haforsa liután Irmán Albina hodi kontinua moris iha vida konsagrada bainhira nia halo profisaun relijioza no sai membru iha Institutu Filhas de Maria Auxiliadora. Irmán Albina la para atu buka no pratika di’ak liután konvite ne’ebé nia simu husi Maromak ho maneira espesiál mak vokasaun Misionária atu haklaken Jezús nia liafuan.

Tuir mai Madre Alma mós hato’o nia mensajen badak hodi agradese ba família tanba entrega ona nia oan feto ida ba Institutu  FMA. Husi família mak mosu fini vokasaun relijioza no misionária, tanba husi família mak nia aprende valór moris nian nu’udar umanu no sarani nian.

Irmán Albina mós agradese ba Maromak tanba husi komunidade Fuiloro mak nia deskobre ninia vokasaun Misionária, tanba nia nu’udar menina koléjiu ne’ebé estuda iha Eskola Téknika Agríkula (ETA) Don Bosco Fuiloro.  Família nafatin suporta nia ho orasaun ba nia intensaun sira.

Ikus liu almosu hamutuk no kumprimenta husi menina Koléjiu Morano no mós Irmán FMA sira hotu.

(Alice Filipe, FMA  & Ines Bartolo, FMA)