Dili – Ho festa S. Domingos Savio nian ohin  6  Maiu, fulan ne’ebé dedika ba Nai-Feto, ami komunidade Beata Eusebia Comoro-Dili selebra festa ne’e hahú ho Santa Misa hamutuk ho komunidade Divina Provvidenza ne’ebé selebra husi pe. Basilio SDB no iha padre nia omilia haktuir katak Domingos Savio mak labarik ne’ebé iha aten brani atu sai santu no lakohi halo sala tan ne’e nia halo propózitu 3 mak tuir mai ne’e: sei konfesa no komunga dalabarak tuir konfesór nia lisensa; sei halo santu loron Domingu no loron santu sira seluk; Jezús no Maria mak hau nia belun.

Ne’e mak dalan ne’ebé tulun Domingos Savio atu sai santu maibé bainhira nia hela iha ambiente Don Bosco nian, Don Bosco dehan ba nia: atu sai santu la presiza halo sakrífisiu barak maibé halo didi’ak ó-nia knaar sira loroloron nian, hanesan estuda, halimar, reza, uza tempu didi’ak hodi halo ó-nia knaar sira maske knar kiik deit maibé halo ida ne’e sai estraordinário, ne’e mak dalan ne’ebé simples liu atu bele sai santu. Ne’e nu’udar mensajen ne’ebé padre husik hela, liu husi festa ida ne’e.

Nune’e, mai ita husu S. Domingos Savio, atu tulun ita ida-idak kolabora ho Maromak atu sai aten-brani hanesan Domingos Savio hodi halo didi’ak ita nia knaar iha moris lor-loron nian, liu-liu iha tempu pandemia ida ne’e. S. Domingos Savio hakarak husik hela mensajen mai ita ida-idak nu’udar labarik, foin-sa’e no familia sira katak atu sai santu la’ós dalan ne’ebé difisil maibé fasil de’it, importante halo didi’ak ita nia knaar ho domin no ho ksolok, hanesan iha nia motto dehan di’ak liu mate duké halo sala.

Hodi taka festa ne’e, iha loraik ami Irmán sira reza rozáriu hamutuk ho foin-sa’e sira grupu Palomino iha Gymn eskola nian, hafoin iha jogus pasa bola hodi dada mensajen kona-ba Domingos Savio no aprezenta drama badak ba 5 minutu de’it tuir testu ne’ebé grupu dada. Nune’e festa ne’e sai simples maibé nakonu ho ksolok no tempu hanesan selebra mós foin-sa’e Victoria nia Birthday nune’e festa sai rame. Hafoin reza hodi merenda hamutuk nu’udar maun-alin iha Kristu no haksolok hamutuk ho Domingos Savio iha tempu pandemia ida ne’e.

(Onesiana do Rosário Baptista FMA)