Dili – Tempu Estadu Emerjénsia ho konfinamentu obrigatóriu no serka sanitária no agrava ho efeitu inundasaun 4 Abríl nian, halo populasaun sira susar hetan osan ba nesesidade bázika, liuliu hahán.

Ema husi bairru ruma iha Dili laran mai husu hahán iha komunidade FMA sira, no Irmán sira buka fó buat ne’ebé iha no orienta sira atu bá iha sede suku, eh iha parókia. Iha semana ne’e nia laran iha família 24 ne’ebé FMA sira tulun, hamutuk ho ekipa husi grupu foin-sa’e volontariadu Palomino Salesiana. Grupu ikus ne’e moris durante tempu inundasaun iha fulan Abríl. Sira mak foin-sa’e sira ne’ebé tulun FMA sira iha asaun karidade sira.

Família sira ne’ebé husu tulun hahán maioria tanba laen sira lakon serbisu hanesan kondutór, badaen, tanba patraun sira labele selu. Balun fali iha situasaun prekária hori uluk kedas, hanesan faan ai, no baibain sira faan ema seluk nian no sira simu osan tuir buat ne’ebé sira faan. Balun serbisu iha mota, peneira rai-henek, no dala barak ema la sosa eh sosa ho presu $5 eh $ 10 de’it, no laen sira moras. Sira-nia hela fatin iha Mota Comor ninin, iha Beduku no iha iha bairru Unidos, Ai-Bubur Laran.

Ami buka atu sira bá iha fatin loos, tanba tuir governu, Dili labele dehan katak “ema hamlaha”. Maibé tuir família sira-ne’e, ema husi suku mai haree, foti naran, maibé to’o agora sira seiduak simu tulun. Tulun sira simu mak husi igreja, parókia ka relijiozu/a sira.