Dili – Horsehik, loron 4 Jullu 2021, Jovem sira husi grupo Palomino, Movimentu Juvenil Salesiano, jovem reprezentante Diocese no Komunidade FMA hamutuk ho animadores sira tuir semináriu badak ida ne’ebé fó husi Padre Salvador, SDB iha Portugal ne’ebé ko’alia kona-ba “Jornada Mundial da Juventude” (JMJ). Semináriu ida ne’e hala’o virtualmente liu husi Zoom iha tuku 4 lorokraik otl.

“Jornada Mundial da Juventude” (JMJ) mak enkontru mundial ida entre jovem sira ho Papa. Iha momentu hanesan, nu’udar peregrinasaun, festa ba jovem sira, expresaun Igreza Universal no momentu forte ba evanjelizasaun iha mundu juvenil nian. JMJ existe nu’udar konvite ida ba jovem sira atu harii mundu ida justu no solidáriu. JMJ ne’e loke ba jovem katóliku sira hotu, inklui hirak ne’ebé besik liu ka dook liu husi Igreza.

JMJ tuir mai sei hala’o iha Portugal iha tinan 2023. Tema ba JMJ Lisboa 2023 ne’e rasik mak “Maria levantou-se e partiu apressadamente” (Lc, 1,39), mak sitasaun bíbliku ne’ebé hili rasik husi Santo Padre Fransisco. Tema sira ba JMJ ba tinan hirak iha kotuk mós iha relasaun ho “Nossa Senhora”. “Maria de Nazaré” mak figura boot ida iha dalan kristaun nian, iha ne’ebé hanorin ita atu hatán “Sim” ba Maromak.

Kona-ba eventu ne’ebé sei hala’o, tuir plano 50% sei hala’o online, 50% seluk sei incerteza hela tanba Pandemia. JMJ sei hala’o durante semana ida nia laran iha ne’ebé iha loron balun nia laran Jovem sira sei halo encontro direto ho Santu Padre rasik.

La’ós ne’e de’it, atu bele tuir JMJ ho di’ak iha preparasun espirituál ne’ebé Jovem sira presiza tuir molok too iha loron atual JMJ nian. Preparasun sira ne’ebé mak halo mak Jovem sira presiza halo mak entre sira tuir katekeze dala 9 iha tinan 3 nia laran. Iha Evento JMJ nian rasik, Jovem mak sai nu’udar protagonista, tan ne’e importante tebes atu jovem sira bele tuir eventu JMJ nian ho espíritu no mentalidade forte.

Molok remata semináriu refere Padre Salvador, SDB fó dezafiu rua ba jovem sira hotu atu bele resolve, dezafiu dahuluk mak atu traduz Hino Oficial JMJ 2023 nian, no ida seluk mak atu bele halo preparaun espirituál mós ba JMJ 2023 nian.

Ikus liu la haluha, Reprezentante Jovem sira, hato’o sira nia liafuan agradese nian ba Padre ne’ebé disponivel atu fahe informasaun no fó koñese Saida mak “Jornada Mundial da Juventude” ne’e rasik no saida de’it mak sei hala’o iha ne’ebá, tan la’ós jovem barak iha Timor-Leste mak hatene ida ne’e, no Jovem sira espera katak sira bele fahe tutan koñesimentu ne’ebé sira iha ba sira nia grupu ka grupu sira seluk. Atu taka sira deseja katak JMJ 2023 bele hala’o ho di’ak no fó ksolok ba jovem sira hotu.

Vitoria Belo