Festa agradesimentu inspetoriál 2021

Festa agradesimentu inspetoriál 2021

Dili – Festa agradesimentu inspetoriál 2021 nia tema foti husi Papa Francisco nia ensíklika “Fratelli tutti”. Iha ninia preparasaun komunidade edukativa sira estuda kapítulu sira ensíklika nian hodi konklui ho sharing Maromak nia Liafuan ne’ebé ita hetan mós iha ensíklika: “Samaritanu Di’ak”.

Komunidade edukativa sira, hodi estuda ensíklika ne’e, foti mós empeñu konkretu sira tuir ida-idak nia kontestu hanesan: halo asaun karidade no solidariedade ba maluk kiak sira no ba foin-sa’e kiak sira (TL), bá hasoru ema kiak sira ho relijiaun seluk hanesan musulmanu no diálogu ho relijiaun kristaun seluk (Indonesia).

Tuir lisan iha semana rua molok festa, loroloron komunidade sira mós harohan ba malu no loron ikus harohan ba ida-ne’ebé anima no ukun Inspetoria, katak provinsiál.

Loron ida molok loron gratidaun, katak 12 Novembru, Irmán diretora sira no Irmán seluk mai ona iha Dili, tanba hahú ona tranzmisaun Kapítulu Jerál 24 grupu dahuluk nian. Iha kalan konselleira inspetoriál no diretora sira hato’o sira-nia agradesimentu ho knananuk ida no aprezentasaun video clip asaun konkreta sira “Fratelli tutti” nian ba provinsiál, Ir Alma Castagna. Iha Buonanotte, Ir Alma dehan katak, hodi haree video sira-ne’e, uluknanai ita agradese Maromak tan ita iha buat ne’ebé ita presiza ba moris, enkuantu maluk balun iha susar laran, no agradesimentu ne’e lori ita atu fahe.

Loron 13 NOvembru mak loron tutun ne’ebé hahú ho Santa Missa selebra husi Pe. Apolinário Neto, provinsiál SDB. Padre Apolinário iha ninia omilia mós salienta moris fraternidade nian, ne’ebé husu ita atu iha “prezensa”, raronak, diálogu, rekonsiliasaun, nst. Mai ita, Don Bosco fó “espíritu família” ne’ebé sai ita-nia estilu relasaun nian no tenke karakteriza ita-nia komunidade sira.

Hotu tiha Santa Missa, ne’ebé knananuk sira anima husi komunidade sira iha Comoro (Dili), hotu-hotu hakat ba fatin ne’ebé espoin prezente sira, ne’ebé sai sinál partilla nian husi buat ne’ebé komunidade sira iha. Tuir kedas iha almosu konfraternizasaun, ne’ebé tuir lisan rai Timor nian nee’e, hahú ho ko’a kek no hemu champaigne. Tuirmai iha jogu animasaun sira organiza husi diretora sira Venilale no Fuiloro nian. Jogu sira hodi foti tema festa nian “Siamo fratelli e sorelle. Grazie!” nia letra sira, partisipante sira fahe ba grupu tolu no buka forma liafuan sira tuir pergunta ne’ebé fó. Jogu seluk mak hakerek iha Irmán sira ninia papél tara iha nia kotuk, sira-nia kualidade sira. Jogu datoluk mak kuiz ba provinsiál, ekónoma, sekretária no mestra novisa.

Klima ksolok no familiár ne’e remata ho dansa sinodál ida iha-ne’ebé komunidade edukativa hotu envolve (menus Indonesia) ba knananuk “Un’altra umanità” autoria Gen Rosso nian.

Parte ikus, mak tempu fó ba provinsiál atu hato’o ninia mensajen no fahe prezente ruma ba hotu.

Lia-menon provinsiál nian liga ba tema festa nian. Uluknanai refere ba asaun karidade hatudu iha video sira. Nia dehan katak asaun karidade ne’e halo ita “konxiente katak iha ita-nia moris, ita tenke agradese nafatin”. Porezemplu, “la’ós katak ema hotu, wainhira meiudia iha buat ruma iha bikan laran; la’ós katak ema hotu kalan bele toba iha kama ida; la’ós ema hotu bele sosa buat ne’ebé nia hakarak. Buat ne’e ita iha, ita iha hanesan baibain. No tanba hanesan baibain, ita la hatene ona agradese… la hatene rekoñese Maromak nia don”. Ir Alma fó hanoin fali katak “buat ne’ebé ita hetan mak Maromka nia prezente ne’ebé liu husi ema seluk ne’ebé fó. Entaun presiza agradese”. Agradese ne’e sai fali empeñu ida: “sai don ba ema seluk… atu fó tan ita mós simu”.

Komentáriu seluk Ir Alma mak kona-ba liafuan “festa”. Husi buat ne’ebé nia observa husi kalan antes no ohin nian, festa mak “simplesmente hela hamutuk, halimar. Ida-ne’e fó ksolok. Ida-ne’e hakonu ita-nia fuan ho domin, hakonu ita-nia fuan ho ksolok ba ema seluk nia prezensa”. Nune’e konvite daruak mak haka’as an atu “loroloron sai festa ida” la’ós tanba hakonu ho sasán, maibé “hakonu ita-nia fuan ho domin no hatene agradese ba ema ne’ebé hamutuk ho ita”. Maski inspetoria ida nia parte la partisipa iha Timor laran tanba labarik no menina sira iha uma no komunidade tolu iha Indonesia, “ita agradese mós ba sira-nia prezensa, ba Irmán ida-idak nia prezensa, la haluha sira no ita kontinua halo dalan iha ksolok”.

Iha parte ikus, molok fahe prezente ki’ik-oan ruma, nia fó sai knaar foun sira ba konselleira foun na’in rua, Ir Olga (la’ós foun) no Ir Angelita no vigária provinsiál foun mak Ir Evangelina Xavier. Konselleira ne’ebé remata ona knaar mak Ir Jacinta no Ir Esmeralda. Knaar sira seluk sei fó sai iha tempu programasaun nian.

(JG)