Títulu “Auxiliadora dos Cristãos” / Auxilium Christianorum, Papa S. Pio V mak hatama iha Ladaiña Na’i-Feto nian, depoizde vitória iha Lepanto, vitória ne’ebé hetan tanba tulun husi Maromak no Na’i-Feto.

Festa Maria Auxiliadora nian hahú durante revolusaun franseza. Imperadór Napoleão Bonaparte dadur Santu Padre Pio VII iha Palásiu Fontaineblea. Iha dadur laran, Amu-Papa dedika nia orasaun sira ba Na’i-Feto, hodi invoka nia ho títulu Auxílium Christianorum, hodi husu atu nia proteje Kreda ne’ebé hetan atake maka’as.

Papa Pio VII nia orasaun Maromak rona liutiha tinan lima iha dadur laran. Iha 24 Maiu 1814, Papa Pio VII tama solenemente iha Roma, nune’e rekupera ninia knaar nu’udar bibi-atan Kreda nian. Iha 1815, bainhira Kreda rekupera ona nia kbiit no bele dada iis iha hakmatek, Amu-Papa institui festa N”ossa Senhora Auxiliadora dos Cristãos: ba loron 24 Maiu, atu halo memóri ab anafatin kona-ba ninia filahikas ba Roma, depoizde ezíliu iha Fransa.

Buat ne’ebé interesante mak, iha fatin sira seluk, sarani sira selebra ona Na’i-Feto ho títulu importante ida-ne’e. Iha Ukraina, husi kedas tinan 1030, sira selebra ona Maria nu’udr Auxiliadora ka Tulun-Na’in.

Don Bosco, Fundadór Kongregasaun Saleziana (SDB) no Filhas de Maria Auxiliadora (FMA), iha venerasaan espesiál ba Na’i-Feto Auxiliadora.

Don Bosco hakerek: «Festa Maria Auxiliadora nian tenke sai prelúdiu [antisipasaun] ba festa rohan-laek ne’ebé ita hotu tenke selebra hamutuk loron ida iha Lalehan».