Escola Maria Auxiliadora selebra ninia Padroeira

Escola Maria Auxiliadora selebra ninia Padroeira

Dili – Loron 24 Maiu mak loron boot Maria Auxiliadora nian. Ba Família Saleziana halo preparasaun ba festa ne’e lori loron sia katak novena.

Eskola Maria Auxiliadora ne’ebé lori Na’i-Feto Auxiliadora nu’udar Padroeira, selebra festa ne’e  Eukaristia no prosisaun ba gruta Na’i-Feto nian.

Santa Missa hetan partisipasaun husi estudante husi Pré-Eskolár to’o Siklu Datoluk. Eskola ne’ebé iha alunu/a aluna rihun ida resin hakonu Kreda atu hahí Maromak ba tulun hotu simu husi Maria Auxiliadora nia intersesaun.

Santa Missa prezide husi Pe. Acácio Castro SDB. Iha ninia omilia nia husu atu alunu sira halo tuir Don Bosco nia hanorin: “Kuda devosuan ba Na’i-Feto no imi sei haree saida mak milagre”. Nia konta istória oinsá Don Bosco hahú nia obra ba labarik no foin-sa’e kiak liu, ho inpirasaun husi mehi tinan 9. Iha-ne’ebá iha Na’i_Feto no Jezús ne’ebé bolu no hanorin nia oinsá tau matan ba foin-sa’e sira. Jezús fó ba Joãozinho Mestra ida: Na’i-Feto Virjen Maria. Maria mak gia Don Bosco atu realiza ninia misaun. Hodi Maria nia tulun nia obra namkari iha mundu tomak. Atu hala’o obra sira Don Bosco harii Kongregasaun Saleziana no Filhas de Maria Auxiliadora. Kongregasaun Filhas de Maria tinan ne’e halo aniversáriu fundasaun ba dala 150.

Pe Acácio konvida hotu-hotu atu, nu’udar oan sira, harohan husu Na’i-Feto nia tulun ho orasuan rozáriu. Sai Maria nnia oan, hatudu mós hodi hala’o knaar estudu no seluk taan ho di’ak.

Remata Eukarista Santa, estudante, manorin no Irmán sira halo prosisaun to’o gruta hodi reza tersu. Labarik Pré-eskolár mak la tuir prosisaun. Sira harohan de’it iha eskola.

Hotu tiha prosisaun estudante sira lori hikas ilas Na’i-Feto ba Eskola, halo merenda no hafoin fahe malu.

(Sidónia Freitas-JG)