Dili –  Semana Laudato Si’ 2022 hahú iha loron 22 Maiu no remata iha 29 Maiu. Semana Laudato Sí tinan 2022 selebra tinan hitu Ensíklika Laudato Sí , husi Papa Francisco. Iha komunidade FMA sira konserteza iha atividae oioin. Iha komunidade Eusebia Palomino mós iha atividade, ho modu espesiál iha Escola Maria Auxiliadora  estudante sira halo kompetisaun resiklajen nian.

Aleinde kontinua atividade sira ne’ebé programa ona ba 2022 hanesan durante rekreiu, fó minutu 5 molok tama fila fali eskola atu halo limpeza; alunu/a sira hotu uza nia kantil bee nian atu la soe plástiku; halo estrume orgániku; ba Semana Laudato Si’ alunu sira turma ida-idak prepara resiklajen ho kriatividade.

Nune’e, ohin, 27 Maiu 2022, sira hotu, hahú Pré-eskolar to’o siklu datoluk, tau sira-nia produtu iha espozisaun. Manorin sira mak sei hili no vota, hafoin Diretora eskola tau hamutuk votu sira atu haree sé mak sai manán-na’in, tuir siklu ida-idak.

Sira mós ohin halo orasaun ho elementu sira natureza nian hodi agradese Maromak ba Kirasaun no halo empeñu atu tau matan ba meiu ambiente no ba malu.