Papa Francisco nia lia-menon molok harihan Angelus, 3 Jullu 2022

Maun no biin-alin sira, bondia!

Iha Evanjellu Liturjia domingu ne’e nian ita lee katak «Na’i hili eskolante na’in 72 seluk no haruka sira na’in rua-rua ba uluk Nia iha sidade no fatin ne’ebé Nia sei bá» (Lc 10,1). Na’i haruka eskolante sira na’in rua-rua, la’ós mesak. Ba iha misaun na’in rua-rua, husi pontudevosta prátiku, parese fó liu desvantajen duké vantajen. Iha risku atu sira na’in rua la konkorda malu, ciha ain-hakat la hanesan, ida sai kole no moras tuir dalan, hodi obriga ida seluk atu para. Bainhira mesak, parese dalan lalais liu no laiha obstákulu. Jezús la hanoin nune’e: Nia la haruka bá uluk Nia ema solitáriu sira, maibé eskolante sira ne’ebé bá na’in rua-rua. Ita halo pergunta ida: sá loos razaun ba Na’i nia hilin ida-ne’e?

Eskolante sira nia knaar mak atu bá uluk iha knua sira no prepara ema sira atu simu Jezús; no orden ne’ebé Nia fó la’ós kona-ba saida mak sira tenke dehan, maibé oinsá sira tenke sai: katak la’ós iha “livrinu” buat ne’ebé sira tenke dehan, lae; kona-ba sasin moris nian, sasin ne’ebé tenke fó liufali liafuan sira atu dehan. Defaktu nia define sira serbisu-na’in: katak simu bolu atu serbisu, atu evanjeliza liuhusi komportamentu, No asaun konkreta dahuluk ne’ebé eskolante sira hala’o sira-nia misaun mak ida atu bá na’in rua-rua. Eskolante sira la’ós “batedór livre”, pregadór sira ne’ebé la hatene fó liafuan ba ema seluk. Eskolante nia moris mak uluknanai haklaken Evanjellu: sira-nia hatene moris hamutuk, respeita malu, la hatudu ida hatene liu ida seluk, hotu-hotu refere ba Mestre ida mesak.

Bele elabora planu patroál perfeitu, hala’o projetu ne’ebé halo didi’ak, organiza dwtalle ki’ik hotu; bele halibur ema lubun boot no iha meiu barak; maibé se la iha disponibilidade ba fraternidade, misaun evanjélika la la’o bá oin. Dala ida, misionáriu ida haktuir katak nia bá Áfrika ho ninia konfrade ida. Depoizde tempu ruma nia haketak an tiha husi nia konfrade, hodi hela iha knua ida iha-ne’ebé nia hala’o ho susesu atividade konstrusaun sira ba komunidade nia di’ak. Buat hotu funsiona di’ak. Maibé loron ida nia hanesan hakfodak: nia sai konxiente katak nia moris la’ós ida emprezáriu matenek ida nian, nafatin iha konstrusaun nia klaran no surat sira  kontabilidade nian! Maibé… no “maibé” hela iha ne’ebá! Nune’e nia husi jestaun ba ema seluk, ba leigu sira, no nia ba hamutuk ho nia konfrade. Nia komprende katak Na’i haruka eskolante sira “na’in rua-rua”: misaun evanjelizadora la abzeia ba ativizmu pesoál, katak “halo” maibé iha sasin “domin fraternu”, maski tenke liuhusi difikuldade sira ne’ebé mai husi moris hamutuk.

Entaun ita bele husu: oinsá ita lori ba ema seluk liafoun di’ak Evanjellu nian? Ita halo ho espíritu no estilu fraternu, eh ho mundu  nia maneira, ho protagonizmu, kompetitividade no efisientizmu? Ita husu se ita iha kapasidade atu kolabora, se ita hatene foti desizaun hamutuk, hodi respeita sinseramente ema ne’ebé iha ita–nia sorin no hodi tau atensaun ba ninia pontudevoista, se ita halo iha komunidade, la’ós mesak. Defaktu, liuliu hodi halo nune’e mak eskolante hatudu sai Mestre nia moris, hodi haklaken tebes duni ba ema seluk.

Atu Virjen Maria, Kreda nia Inan, hanorin ita atu prepara Na’i nia dalan ho sasin fraternidade nian.