Dili, 13 Janeiru, Irmán nain 4 hamutuk ho maluk lubuk ida; Relijiozu/a no leigos balun ne’ebé tau matan ba labarik sira ne’ebé vulneravel iha areia rurál, partisipa iha Serimónia entrga Ekipamentu ba programa Eskola ba uma iha salaun Ministerio Solidaridade Social  e Inclusão (MSSI) Kaikoli-Dili.

Iha tempu Covid-19 espalla iha territóriu Timor laran, fó impaktu ba labarik sira atu asesu ba prosesu aprendizajen. Atu garante labarik sira nia prosesu aprendizajen mak MSSI servisu hamutuk ho Ministerio Edukasaun (ME) no UNICEF oferese ekipamentu sira hanesan Ipad no Projetor ba grupo sira ne’ebé tau matan ba labarik sira hanesan Orfanatu sira atu ajuda labarik sira iha parte edukasaun. Nune’e ME prepara plata forma ida ho naran Eskola ba uma atu tulun labarik sira iha uma kontinua estuda.Tamba Edukasaun mak baze ba dezenvolvimentu no labarik sira tenke asesu ba direitu fundamental ne’e, presiza tebes suporta husi ema hotu atu bele kria futuru ne’ebédiak ba sira. Momentu ida ne’e Covid laiha maibe ita bele uza ekipamentu sira ne’e atu tulun sira nia estudu iha uma wainhira fila ona husi eskola.

Madre Salesiana sira iha Orfanatu rua mak hanesan Orfanatu Beata Laura Vicuña Laga no Orfanatu Saun Domingos Savio Venilale. Iha Orfanatu rua ne’e; ida-idak  simu labarik husi Eskola Pre-Primaria to’o Pre-Secundaria hamutuk liu Atus ida. Nune’e ho ekipamentu ne’ebé simu labarik sira nia estudu no mos bele aprende diak liu tan.

Ami agradese tebes ba Ministeriu kompetente ne’ebé ho laran luak ajuda ona labarik sira ne’ebé ami tau matan. Hamutuk ho labarik sira iha Orfanatu rua sei reza ba ita bo’ot sira no nai ulun sira nasaun ida ne’e nian atu tane a’as labarik nia direitu no iha fuan bo’ot atu preokupa ba dezenvolvimentu rai ida ne’e nian liu-liu atu labarik sira nune’e bele hetan no goja futuru ida ne’ebé nakonu dame.

Obrigada wain no Maromak fo bensaun ba ita hotu.

(Noemia de Deus, FMA)