Dili – iha loron 24 abril, komunidade Divina Providenza haksolok hamutuk hodi agradese ba Maromak, ba maun Aldo nia presenza iha komunidade no mós agradese ba prezente moris nian ne’ebé Na’i haraik ba menina sira no ba maun Aldo. Festa hahu ho misa ne’ebé prezide husi Pe. Mario de Sousa, Sdb no misa hahu tuku 18:15 to’o remata ho intensaun ba maun Aldo no menina sira ne’ebé halo tinan husi fulan Janeiru to’o Abril 2017.

Iha nia omilia, Padre husu ba menina sira ida-idak atu:

• Agradese nafatin ba buat hotu ne’ebé simu lor-loron maske kiik no lafolin.
• Buka atu rekoñese buat diak ne’ebé simu no hetan hodi la haree ba frakeza ne’ebé iha. Dala barak ema lalais atu lamenta fallansu ou frakeza sira hodi haluha katak Maromak sei haraik iis foun ne’ebé halo ita sei bele dada iis, iha ibun no nanal bele ko’alia, iha tilun bele rona no iha matan bele haree, etc.
• Grasa moris nian ne’ebé simu la’os dalan ida atu buka halo kompetisaun ou kompara ha’u nia-an rasik ho ema seluk maibé buka atu kompete ho ita nia-an rasik hodi husu ba ita-an rasik. Oinsa ha’u nia-an agora dau-daun ne’e di’ak liu tinan uluk ka hanesan de’it, laiha mudansa?

Hodi kompara fali leitura no Evanjellu, Padre foti pasajen ida ne’ebé dehan: Apostolo sira sai hodi ba haklaken hodi husik sira nia fatin. Haree fali ba maun Aldo nia esperiensia mak nu’udar ema ne’ebé pronto atu husik nia fatin atu fo nia-an hodi serbi. Nia prontu atu halo sakrifisiu, atu adapta no atu fó buat ne’ebé iha.

Remata tiha missa, kontinua ho han kalan hamutuk hodi fahe ksolok ba malu hodi komprimenta sira ne’ebé halo tinan.

Depoizde han kalan, komunidade tomak halibur hamutuk fali iha lobby atu komprimenta Maun Aldo ne’ebé sei fila fali ba Italia iha loron 26 abril. Iha momentu divertimentu ida ne’e, menina sira husi grupu ida-idak hato’o sira nia sensu agradese nian ba maun Aldo liu husi Kanta, dansa no fo prezente ruma nu’udar rekordasaun husi Timor. Maun Aldo mós agradese ba komunidade no ba menina sira ida-idak ne’ebé halo nia sente nu’udar familia maske tinan-tinan nia hasoru ema diferente. Maun Aldo dehan: “ha’u la hanoin saida mak ha’u fó maibé ha’u sente katak ha’u mós simu barak husi imi”.

 

Miranda da Cruz