Tema Domingu XXIX Tempu Komún nian
Liafuan ne’ebé liturjia ohin nian aprezenta mai ita konvida ita atu mantein relasaun metin ho Maromak, komuñaun íntima, diálogu insistente ida: nune’e de’it mak fiar-na’in ida bele aseita Maromak nia projetu sira, komprende ninia silénsiu sira, respeita ninia ritmu sira, fiar iha ninia domin.
Evanjellu fó hanoin katak Maromak la auzente ka taka matan ba Povu nia terus… Fiar-na’in sira tenke deskobre katak Maormak hadomi sira no soi projetu salvasaun ida ba ema hotu; deskoberta ne’e bele halo de’it liuhusi orasaun, diálogu kontínuu no perseverante ho Maromak.
Leitura dahuluk halo ita entende katak Maromak intervein iha mundu no salva ninia Povu, dalabarak hodi uza ema sira nia hahalok: maibé atu ema manán funu todan ezisténsia nian, nia tenke konta ho Maromak nia tulun no kbiit… Tulun no kbiit ne’e mai husi orasaun, diálogu ho Maromak.
Leitura daruak, maski la refere diretamente ba relasaun entre fiar-na’in ho Maromak, aprezenta fonte privilejiada ida enkontru entre Maromak no ema: Sagrada Eskritura… Nu’udar Maromak nia Liafuan ne’ebé hatudu ba ema sira dalan ba moris nakonu, nia tenke asume fatin aas iha esperiénsia sarani.
