S. Mateus husik buat hotu, hodi tau sees moris ida liga ho osan no podér!
Igreja selebra ohin, ho forma espesiál, S. Mateus apóstolu no evanjelista nia moris, nia ne’ebé molok konversaun nia naran Levi. Levi ka Mateus hela no serbisu nu’udar kobradór ka koletór impostu nian iha Cafarnaum, Palestina. Bainhira nia rona Jezús nia Liafuan: “Mai tuir ha’u” nia husik kedas buat hotu, tau ba sorin moris ne’ebé liga ba osan no podér atu serví iha pobreza: proklamasaun mensajen kristán!
Mateus ema riku kobradór impostu nian no hatán ba Mestre nia bolun ho entuziazmu. Ia hetan iha Lucas nia Evanjellu, Mateus ne’ebé prepara no konvida Mestre ba festa boot despedida nian iha nia uma. Nune’e, ema lubun boot publikanu nian no sira seluk ne’ebé povu kondena, tur iha meza ho Jezús ne’ebé mai, la’ós ba ema di’ak sira maibé ba ema moras sira; la’ós ba justu sira, maibé ba maksalak sira. Nia bolu maksalak sira ba konversaun no moris foun.
Nune’e, hodi Na’i nia mizerikórdia, hodi ninia hateken domin nian, iha silénsiu no diskrisaun, Na’i liberta nia husi osan hodi halo di’ak iha nia moris.
Iha Evanjellu Mateus nian mak ita kontempla iha pasajen oioin liafuan kona-ba osan, hanesan: “Imi keta halot hamutuk murak iha rai, ne’ebé meak ho ular han mohu” (Mt 6,19) no mós: “Imi keta serví Maromak no osan” (Mt 6,24).
Maibé ho Judas fali, ne’ebé kaer “bolsu” komunidade apostólika nian ne’ebé Jezús forma oinseluk fali, Mateus husik ninia osan hotu atu tuir Jezús, no Judas faan Jezús ba osan tolunulu!
Apóstolu ne’ebé ohin ita festeja ho Igreja tomak, ne’ebé nia naran signifika Maromak nia Prezente, sai koñesidu iha ristianizmu la’ós ba nia obra misionária iha Loro-Sa’e, maibé ba Evanjellu ne’ebé hodi inspirasaun mai husi karizma nia bele hakerek, iha tinan sira 80-90 iha Síria no Palestina, Jezús nia moris no hanorin sira. Ita mós selebra ninia martíriu ne’ebé haraik vitória ba apóstolu, santu no evanjelista ida-ne’e.
S. Mateus mak patronu bankeiru sira-nian no S. Jerónimo aprezenta nia ho mane ida iha nia sorin nu’udar símbolu ninia Evanjellu nian.
S. Mateus, harohan mai ami!
