Editoriál: Remata tinan pastorál hodi agradese

Ita Sarani sira iha “toman” di’ak ida ne’ebé loroloron ita halo hanaran “ezame konxiénsia nian” ne’ebé prepara ita atu halo konfisaun. Kardeál Martini sujere hala’o estájiu tolu avaliasaun ka konfiasaun katak: confessio laudis, confessio vitae no confessio fidei. Confessio laudis halo ó rekoñese buat ne’ebé pozitivu iha ó-nia moris nu’udar Maromak nia don; Confessio vitae halo ó konxiente kona-ba atrazu sira, matan-dukur sira, rezisténsia sira no salan sira ó-nia dalan nian; Confessio fidei tulun ó atu hetan konfiansa iha Maromak no iha Ninia Espíritu atu ba oin iha ó-nia kreximentu. Ita remata daudaun tinan pastoral ida, nune’e konvite mai ita atu halo avaliasaun ba ita-nia programa sira, hahú husi faze planu to’o ninia atuasaun.

Ita bele mós uza modalidade “SWOT analysis” atu avalia. Iha SWOT, ita buka haree uluknanai husi ita-nia parte sá de’it ita-nia “strengths” ka forsa sira no ita-nia “weaknesses” ka frakeza sira. Hafoin hateke ba ita-nia sorsorin ita husu sá de’it “opportunities” ka oportunidade sira no sá de’it “threats” ka ameasa sira mai husi li’ur ne’ebé ita hasoru. Husi avaliasaun mak ita haree oinsá la’o ba oin ho realizmu, hodi husu saida mak Espíritu sujere mai ita. Importante mak liña asaun sira-ne’ebé ita sei foti hatán ba ita-nia realidade, konkretu no bele hala’o.