Editoriál: Karizma nu’udar forsa kriativa iha tempu istóriku ida-ne’e
Iha 2020 tan situasaun “lockdown” kauza husi pandemia virus corona nian, ita la konsege publika revista FMA TIN TATOLI. Tinan ne’e ita hahú fali.
Ha’u hakarak fahe uitoan kona-ba Madre Yvonne nia liafuan iha enkontru online CIAO nian hodi prepara ba Kapítulu Jerál 24 ne’ebé ita la hatene bainhira halo, tanba inserteza sira mai husi pandemia covid-19. Nia dehan katak, bainhira hanoin ba tema Kapítulu Jerál nian – “Halo buat ne’ebé Nia dehan ba imi” (Jo 2,5). Komunidade ne’ebé hahoris moris iha fuan kontemporaneidade nian –, “ita konxiente kona-ba dezafiu sira ne’ebé kontemporaneidade oferese, maibé la hanoin ba evolusaun mundu nian ida-ne’e; tanba ne’e mak tema ne’e sai atuál liután no tulun ita atu dixerne liután oinsá moris ita-nia karizma no misaun edukaktiva iha kontestu mundu ne’ebé moris daudaun krize profunda ne’ebé kona aspetu hotu moris nian”.
Maski oras-ne’e ita moris iha tempu difisil, maibé Madre Yvonne hatudu otimizmu no esperansa boot. Iha ninia lia-menon sira nia afirma pontu sira tuirmai ne’e:
Madre Yvonne fó hanoin ba CIAO katak, “Ásia mak futuru mundu nian no iha buat ruma importante atu dehan ba Kreda no Institutu”. Nune’e, nia husu atu FMA sira iha kontinente Ásia bele sai “naroman iha Ázia nia fuan, iha mundu nia fuan, roman ne’ebé Jezús rasik mak halakan no fó sentidu ba moris”.
- Tempu ida-ne’e la’ós fasil atu moris, maibé tempu ida entuziazmu no interesante, tanba, bainhira iha dezafiu sira ita hetan impulsu ba babukak, ba orasaun, ba dixernimentu, ba kriatividade. Iha momentu difisil hotu istória Institutu nian, karizma sempre sai nu’udar forsa kriativa. Espíritu Salezianu mak espíritu otimista, konstrutivu, sinál esperansa nian ba foin-sa’e sira, ba família sira ne’ebé presiza hetan ema sira ne’ebé fó apoiu ba sira-nia esperansa, ne’ebé loke orizonte futuru nian, ne’ebé tulun sira sente nu’udar protagonista mudansa umanidade nian.
- Madre Yvonne foti nu’udar modelu Papa Francisco ne’ebé la hein atu krize remata, maibé nia impulsiona daudaun Kreda atu buka dalan foun sira (ekonomia, Paktu globál-edukativu, tinan Laudato Si’ nian…), nune’e mós Don Bosco, ne’ebé la hein mudansa sosiál atu atua. Amu-Papa dehan katak husi krize ida ema la sai hanesan uluk: di’ak liu eh aat liu. La’ós krize mak muda ita, maibé depende oinsá ita moris krize ne’e, oinsá ita husik nia interpela ita, moris no rekoñese Maromak nia bolun sira iha momentu istória nian ida-ne’e.
- Iha pandemia ida-ne’e ita simu konvite atu reflete kona-ba esensiál, atu reforsa fraternidade entre ita ho foin-sa’e sira, ho leigu sira ne’ebé partilla misaun, tanba fraternidade no solidariedade mak sinál esperansa nian.
- Nia konvida FMA sira atu hetan oan-feto foun sira no fó ba foin-sa’e feto sira hakaran atu hamutuk ho ita, hanesan ita, katak sira bele fó kontributu ho sira-nia moris ba foin-sa’e sira.
- Hodi halimar nia fó hanoin katak, nia sempre insiste ita atu prepara an ba komunikasaun, maibé, presiza virus ida ne’ebé obriga ita hotu atu tama iha komunikasaun online.
Madre Yvonne fó hanoin ba CIAO katak, “Ásia mak futuru mundu nian no iha buat ruma importante atu dehan ba Kreda no Institutu”. Nune’e, nia husu atu FMA sira iha kontinente Ásia bele sai “naroman iha Ázia nia fuan, iha mundu nia fuan, roman ne’ebé Jezús rasik mak halakan no fó sentidu ba moris”.
***JG***
