Editoriál: Saida mak halo ita maun no biin-alin?
Pergunta ne’e nalian maka’as iha ita-nia tempu ohin, iha hahalok no jest
u sira loroloron nian. Situasaun ne’ebé ita tenke moris ohin loron hanesan pandemia coronavirus nian, dezastre naturál sira, violénsia sira, halo ita husu liután “saida mak kesi ita hamutuk”…
Nesesidade atu sente parte realidade ida mesak relasaun nian sai forte liután. Ita-nia situasaun suspensu nian entre konfinamentu no solidariedade, izolamentu no sai bá li’ur, sente responsabilidade ba ema seluk no ba ita-nia uma komún, planeta rai ne’e, halo ita sai konxiente ba beibeik katak ita labele haketak an husi ema ema seluk no kriasaun ne’e. La iha ema ida bele moris mesak, la iha ema mak illa ida.
Papa Francisco iha “Fratelli tutti” hateten katak xave atu sai husi taka an bá loke an mak «rekoñesimentu bazilár no esensiál ne’ebé tenke halo atu la’o ba amizade sosiál no fraternidade universál: konxiente kona-ba oinsá ser umanu ida folin, hanesan ema ida ho valór, nafatin no iha sirkunstánsia hotu» (n. 106). Iha nivel ideia ita hotu konvensidu maibé bainhira konxiénsia ne’e tuun iha nivel konkretu nian, «ita tau dezafiu barak ne’ebé halo ita book an, obriga ita atu asume perspetiva foun no dezenvolve resposta foun sira» (n. 128).
Atu fraternidade la sai de’it ideia, Papa Francisco oferese indikasaun presizu liu. Kritériu-gia mak ida halo haburas konxiénsia katak se salva, “salva hamutuk”, se la’e, ema ida sei la salva. Atitude seluk sai obstákulu ba enkontru ne’ebé hariku.
