Festa “Nossa Senhora da Conceição Aparecida” iha Brasil – 12 Outubru
“Nossa Senhora da Conceição Aparecida” nia istória hahú iha meadu 1717, bainhira rona notísia katak Konde Assumar nian, D. Pedro de Almeida e Portugal, Governadór Provínsia São Paulo no Minas Gerais nian, sei liu husi Vila Guaratinguetá nian, iha dalan ba Vila Rica, ohin sidade Ouro Preto (MG).
Kámara Guaratinguetá nian bolu peskadór na’in tolu Domingos Garcia, Filipe Pedroso no João Alves atu bá peska ikan iha Mota Paraíba. Sira bá mota no la konsege kaer ikan ida.
Depoizde tentativa barak lahó susesu, sira ho sira nia roo to’o iha Portu Itaguaçu, no soe sira nia dai no hetan ilas ida lahó ulun, hafoin, soe tan dai no hetan nia ulun, tuirmai soe fali dai no, iha ne’e sira hetan ikan barak halo dai nakonu.
Durante tinan barak, ilas ne’e hela iha Filipe nia uma, to’o loron ida nia oan-mane, tan domin ba Na’i-Feto, halo oratóriu simples ida hodi harohan hamutuk ho familiár no viziñu sira. Na’i-Feto nia fama sai boot ho kbiit estraordináriu no habelar iha rejiaun sira Brasil nian.
Iha tinan 1734, Vigáriu Guaratinguetá nian harii Kapela ida iha Morro dos Coqueiros, loke ba vizita públika, iha 26 Jullu 1745. Maibé númeru sarani sira aumenta ba beibeik no, iha 1834, hahú konstrusaun uma-kreda boot (atuál Basílica Tuan).
Iha tinan 1894, grupu padre no irmaun sira husi Kongregasaun “Missionários Redentoristas” to’o, atu serbisu iha atendimentu ba peregrinu sira ne’ebé bá to’o iha-ne’ebá atu harohan ba Na’i-Feto “Aparecida” ka mosu iha bee.
Papa Pio X, iha 1904, fó orden atu tau koroa ba ilas ho modu solene. Iha 29 Abríl 1908, kreda simu títulu “Basílica Menor” nian. Akontesimentu boot ida, no sentrál ba devosaun ba Maria, mak bainhira iha 1929, Papa Pio XI deklara “Nossa Senhora Aparecida” Padroeira Brasil nian, ho objetivu sira ne’e: povu nia di’ak espirituál no aumentu boot ba beibeik devotu sira-nian ba Maromak nia Inan Imakulada eh Sala-Laek.
Iha 1967, bainhira kompleta tinan 250 devosaun nian, Papa Paulo VI oferese ba Santuáriu “Aparecida” nian Roza Osan-Mean nian, tan rekoñese Santuáriu nia importánsia no estimula kultu ba Maromak nia Inan.
Ho tempu, devosaun ba “Nossa Senhora da Conceição Aparecida” sai boot ba beibeik no númeru peregrinu sira-nian aumenta ba beibeik. Bazílika dahuluk sai ki’ik. Presiza konstrusaun templu seluk, boot liután, ne’ebé bele akomoda peregrinu barak. Ho inisiativa misionáriu Redentorista sira-nian no Bispu sira nian, iha 11 Novembru 1955, hahú konstrusaun uma-kreda seluk, atuál Bazílika Foun (Basílica Nova). Iha 1980, sei iha hela konstrusaun, Papa S. João Paulo II konsagra bazílika ne’e no simu títulu “Basílica 
Menor” nian. Iha 1984, “Conferência Nacional dos Bispos do Brasil (CNBB)” deklara ofisialmente Bazílika “Aparecida” nu’udar Santuáriu Nasionál, nu’udar Santuáriu Marianu boot liu mundu nian.
Iha 2017, Kreda komemora tinan 300 ilas “Nossa Senhora Aparecida” ne’ebé peskadór na’in tolu hetan iha bee sira Mota Paraíba, iha inan 1717.
“Nossa Senhora da Conceição Aparecida, rogai por nós!”
