Iha tinan 452 dK., península italiana nakdedar hasoru Hunu sira, lidera husi Átila. Itália nia parte norte monu ona iha invazór nia liman. Bárbaru sira konkista sidade Aquila, Padova no Milano, na’ok no harahun. Átila avansa no besik Mantova, iha mota Mincio nia ninin.
Leão Magno, eleitu Papa tinan 12 antes, gia delegasaun ida husi Roma atu hasoru Átila, atu hamaus nia atu la kontinua funu invazaun. Lenda haktuir katak Átila fila ba nia rain tan haree S. Pedro no S. Paulo ho surik iha Leão nia kotuk.
Liutiha tinan tolu, iha 455, “Papa Magno” ne’e, maski dezarmadu, konsege hapara, Vándalu sira husi Áfrika iha Roma nia odamatan. Hodi ninia intervensaun, sira foti no na’ok sasán sira maibé la sunu sidade. Bazílika S. Pedro. S. Paolo fuori le Mura no S. Giovanni Laterano la hetan estragu, iha bazílika sira-ne’e mak populasaun subar no salva an.
“Pedro ko’alia liuhusi Leão nia ibun”
Maibé, Leão nia moris la konsiste de’it iha kompromisu ho dame, ne’ebé nia lori ba oin ho korajen no hodi la para. Amu-Papa Leão dedika an mós ba defeza doutrina nian. Nia mak defaktu, inspira Konsíliu Ekuméniku Calcedónia nian – atuál Kadiköy, iha Turkia -, ne’ebé ekoñese no afirma unidade natureza rua iha Kristu: umana no divina; Konsíliu rejeita “erezia Eutiques nian”, ne’ebé nega esénsia umana Maromak nia Oan nian, hanaran “monofizismu”. Leão nia intervensaun iha Konsíliu halo liuhusi testu doutrina fundamentál: “Tomus ad Flavianum”, surat kontra Flaviano, bispu Constantinopla nian. Dokumentu ne’e lee publikamente ba Padre Konsiliár 350, ne’ebé simu ho aklamasaun, hodi afirma: “Pedro ko’alia liuhusi Leão nia ibun, ne’ebé hanorin tuir piedade no lia-loos”.
Teólogu no bibi-atan
Sustentadór no promotór ida Primazia Roma nian, “Pontífise Magno” husik hela iha istória sermaun 100 no surat 150, iha-ne’ebé nia hatudu an nu’udar teólogu no bibi-atan, laran-manas ba komuñaun entre igreja sira, hodi nunka haluha sarani sira-nia nesesidade sira. Defaktu, ba sira mak nia insentiva obra sira karidade nian iha Roma ida-ne’ebé pobreza, hamlaha, injustisa no superstisaun jentiu sira-nian mak domina; nia tau iha prátika asaun hotu ne’ebé presiza – bele lee iha ninia hakerek sira – atu mantein justisa ho modu konstante no “oferese laran-sadia, basá lahó Kristu ita labele halo buat ida, maibé ho Nia buat hotu bele”.
Papa da-45 istória nian
Ema husi Toscana, nia sai diákonu Igreja Roma nian, iha maizumenus tinan 430; liutiha tinan sanulu, Imperatríz Plácida haruka nia atu hadame Gália, ne’ebé sai alvu hadau-malu entre jenerál Aécio no prefeitu pretorianu Albino. Liutiha fulan ruma, Papa Sisto III mate. Leão, Papa Sisto III nia konselleiru, sai ninia Susesór. Ninia konsagrasaun nu’udar Papa da-45 istória nian, realiza iha 29 Setembru 440.
Pontifikadu ida “primazia” [primeiru] sira-nian
Ninia pontifikadu, ne’ebé dura tinan ruanulu-resin-ida, halibur primazia oioin: nia mak Bispu primeiru Roma nian atu hanaran Leão; Nia mak Susesór primeiru Pedro nian atu hanaran “Magno”; Nia mak Papa primeiru, ne’ebé hodi ninia pregasaun, simu títulu “Doutór Igreja nian”, iha 1754 husi Papa Bento XIV. Papa daruak atu hetan títulu Doutór Igreja nian mak “Gregório Magno”.
Leão Magno mate iha 10 Novembru 461. Tuir istoriadór balun, nia mós mak Papa primeiru atu hakoi iha Bazílika Vaticana. Ninia relíkua sira, ohin loron mós, sei konserva iha Kapela “Nossa Senhora do Pilar, iha Bazílika S. Pedro nia laran.
