Editoriál: Husi Na’i-Feto ita husu don dame nian ba mundu
Maski seidauk halo programasaun seséniu pos-kapitulár no programasaun anuál, FMA TIN Tatoli kontinua hakbesik ba ita-boot sira hotu ho edisaun dahuluk 2022 nian.
Entre akontesimentu boot sira mosu iha tinan 2022 nia inísiu mak situasaun ne’ebé halo ita hotu laran-taridu no susar bainhira husi “social” ita haree notísia funu iha Rai oioin liuliu iha Ukraina. Ita la lakon esperansa, maibé tau laran-metin iha Maromak no iha Na’i-Feto nia intersesaun. Hamutuk ho Amu-Papa Francisco ita oferese orasaun no halo “atu konsagrasaun” ba Na’i-Feto nia futar Fuan Sala-Laek iha loron 25 Marsu 2022. Ba Maromak nia Inan no ita-nia Inan, solenemente ita konfia no konsagra an rasik, hamutuk ho Igreja no umanidade tomak, liuliu povu Rússia no Ukrania:
“Simu netik bá, ó Inan,
ami nia harohan ida-ne’e:
Ita, fitun tasi nian, la bele husik ami mo’ut iha tempestade funu nian;
Ita, arka aliansa foun nian, inspira projetu no dalan rekonsiliasaun nian;
Ita, «rai iha lalehan», lori fali mai mundu konkórdia Maromak nian;
Apaga ódiu, akalma vingansa,
hanorin perdaun;
Liberta ami husi funu,
preserva mundu husi ameasa nukleár;
Liurai-Feto Rozáriu nian,
hafanu iha ami laran,
nesesidade atu harohan no hadomi;
Liurai-Feto família umana nian,
hatudu ba povu hotu dalan ba fraternidade;
Liurai-Feto dame nian,
haraik dame ba mundu”.
(JG)
