Liturjia Domingu XXV Tempu Komún nian konvida ita atu deskobre Maromak ida ne’ebé ninia dalan no hanoin sira aas liu ema nia dalan no hanoin sira, hanesan lalehan aas liu rai. Nu’udar konsekuénsia, husu ita atu hakribi eskema mundu no konversaun ba eskema sira Maromak nian.
Leitura dahuluk husu fiar-na’in sira atu fila ba Maromak. “Fila ba Maromak” mak movimentu ida ne’ebé ezije transformasaun radikál ema nian, atu ninia hanoin no hahalok sira reflete Maromak nia lójika, perspetiva no valór sira.
Evanjellu dehan mai ita katak Maromak bolu ema hotu ba salvasaun, hodi la konsidera ema nia fiar nia antiguidade (kleur ona), ema nia kréditu sira, ema nia komportamentu antigu sira. Maromak interese de’it katak ita simu ninia konvite. Nia husu transformasaun ida ita-nia mentalidade nian, atu ita-nia relasaun ho Maromak la marka ho interese, maibé marka ho domin no gratuidade.
Leitura daruak aprezenta mai ita ezemplu sarani ida-nian (Paulo) ne’ebé hakohak, ho forma ezemplár, Maromak nia lójika. Nia hakribi interese pesoál sira no eskema sira egoízmu no komodizmu nian, no tau Kristu, ninia valór sira, ninia projetu, iha sentru ezisténsia nia.
