Dili 22 Agostu 2022
Irmán, leigu no foin-sa’e doben sira,
iha Maria nia Memória ida ne’e, ha’u haksolok atu hakerek liafuan ruma ba imi.
Durante fulan hirak ne’e, liuliu fulan rua ikus, ita-nia komunidade sira hala’o atividade bar-barak atu prepara an ba selebrasaun tinan 150 husi Fundasaun Institutu nian. Komunidade ida-idak esperimenta disponibilidade leigu no foin-sa’e sira atu programa, prepara no hala’o atividade sira ne’e: domin ba ita-nia karizma permite mai ita atu halo esperiénsia sinodalidade nian no halo ita sai konxiente liután katak leigu no foin-sa’e sira haksolok atu servisu hamutuk ho ita no sira disponivel atu fó sira-nia tempu bainhira atividade ruma iha objetivu no folin boot. Sira-nia kolaborasaun fó valór ba FMA nia prezensa iha rai Timor no Indonesia, apresia proposta sira ne’ebé FMA hala’o no liuliu hakarak lolo liman atu buka dalan sira ba labarik no foin-sa’e sira nia di’ak.
Ha’u hanoin katak ita hotu haksolok mós atu haree oinsá labarik no foin-sa’e sira partisipa ho entusiazmu ba atividade sira ne’ebé ita propoin. Bainhira ita hatene prepara ho kriatividade, atensaun ba sira-nia gostu, maibé mós ba atividade ne’ebé iha konteúdu, labarik no foin-sa’e sira partisipa, haksolok ho buat ne’ebé ita propoin no husu mai ita atu kontinua. Iha surat 41, Madre Mazzarello hakerek ba Ir. Teresina Mazzarello: “labele husik mate ahi ne’ebé Na’i halakan iha ó-nia fuan iha loron santu sira ne’ebá”; Madre Mazzarello ko’alia kona-ba ezersísiu espirtuál nia loron sira, maibé ha’u hanoin katak mensajen ida ne’e di’ak mós mai ita iha momentu ida ne’e. Fulan hirak ne’e, ne’ebé ita prepara selebrasaun tinan 150 Fundasaun nian, hanesan loron santu sira ne’ebé Maromak oferese mai ita hotu (FMA, SDB, foin-sa’e, labarik no leigu sira) atu rekoñese buat kmanek ne’ebé Nia halo ba rai oioin liuhusi Institutu nia prezensa. Ita hateke ba pasadu atu hetan motivasaun, inspirasaun no kbiit atu enfrenta futuru ho ninia difikuldade sira, hodi hatene katak Maria nia tulun sei la falta. Tan ne’e, nu’udar konsellu ami hakotu atu selebra aniversáriu ida-ne’e nu’udar Inspetoria iha Cailaco, tanba povu, hodi fó rai pedasu ida, husu atu tau estátua Maria Auxiliadora nian. Nu’udar “monumentu moris agradesimentu nian”, ita hari’i iha Cailaco monumentu fatuk nian ne’ebé reprezenta Maria no ita-nia prezensa iha ema sira leet: ita husik estátua iha ne’ebá, maibé ita lori Maria nia atitude sira iha ita-nia fuan. Iha ne’ebé de’it, ita kontinua hatudu ba ema ne’ebé hasoru ita Maria nia hamnasa midar, nia atensan domin nian no dedikasaun ba sira ne’ebé presiza tulun.
Hodi hanoin ba prosesu sira ne’ebé uza atu prepara Kapítulu, ita bele dehan katak se, iha tempu ida ne’e, ita hotu (FMA, leigu no foin-sa’e sira) rekoñese FMA nia prezensa iha Timor nu’udar prezente Maromak nian no interpreta FMA sira-nia hahalok iha tinan hirak ne’e nu’udar Maromak nia domin ne’ebé ativu iha rai ida ne’e, agora FMA sira de’it iha responsabilidade atu halo hilin profetiku sira, ne’ebé sei halo buras liután karizma.
Ha’u aproveita mós atu agradese sira hotu ne’ebé fó sira-nia tempu, sira-nia matenek, sira-nia kontribuisaun atu atividade hotu ne’e bele la’o ho di’ak no bele fó ksolok ba ema hotu. Ita kontinua agradese Na’i ba prezente Institutu nia liuhusi ita-nia moris loron-loron nian, liuhusi fidelidade ba ida-idak nia vokasaun rasik: hodi halo nune’e, ita bele agradese Maria ba grasa hotu ne’ebé nia haraik mai ita.
Ha’u-nia kumprimentu sai liafuan rua de’it: “Haksolok bá!”
Sr. Alma Castagna
