Ohin, 12 Setembru selebra Maria nia Naran Santíssimu. “Maria nia naran, ne’ebé signifika Na’i-Feto naroman nian, hatudu katak Maromak hakonu ha’u ho sabedouria no naroman, hanesan fitun nabilan sira, atu leno lalehan no rai”, Virjen Maria dehan ba Santa Matilde.
Faktu ida-ne’e, iha-ne’ebé Maromak Inan revela nia naran nia signifikadu ba santa Matilde, S. Luís Maria Grignion de Montfort mak halibur sira, santu propagadór boot devosaun mariana, iha livru “O Segredo do Rosário” [Segredu Rozáriu nian].
Iha Testamentu Foun, evanjelista Lucas mak fó sai feto-raan ne’ebé sei sai Makso’in nia Inan nia naran: “...Feto virjen ne’e nia naran Maria” (Lc 1, 27).
Tanba ne’e mak, husi sarani dahuluk sira to’o ita-nia loron, Maria simu onra ho títulu oioin, tanba “naran” reprezenta “ema”, hanesan Katesizmu Igreja Katólika dehan (2158): “Ema ida-idak nia naran sagradu. Naran mak ema nia ilas. Nia ezije respeitu nu’udar sinál ema ne’ebé lori naran ne’e ninia dignidade”.
Ne’e mak razaun ida husi razaun barak ba festa importante ida-ne’e, festa ida harii ho propózitu atu sarani sira enkomenda ba Maromak, liuhusi Inan Santa nia intersesaun, Igreja nia nesesidade sira, agradese ba ninia tulun no benefísiu sura-laek sira, espesialmente ba sira ne’ebé simu grasa liuhusi Virjen Maria nia mediasaun.
Festa ne’e nia selebrasaun hetan autorizasaun ba dala uluk iha 1513, iha sidade españoala Cuenca nian, no husi ne’ebá habelar ba España tomak. Iha 1683, Papa Inocêncio XI admite iha Igreja Osidente nian nu’udar agradesimentu ba vitória hasoru ema mouro / turku sira iha Batalla Viena nian.
Husi livru “Glórias de Maria”, Santu Afonso Maria de Ligório nian iha orasaun ida atu invoka Maria Santíssima nia naran:
«Maromak Inan no ha’u Inan kmanek liu, oh Maria, loos katak ha’u la soi atu invoka ita naran; maibé ita, ne’ebé iha domin mai ha’u no hakarak ha’u-nia salvasaun, haraik mai ha’u, maski ha’u la soi, grasa atu invoka nafatin tulun mai ha’u liuhusi ita-nia naran domin liu no kbiit maka’as. Basá nia mak tulun ba ema ne’ebé moris no salvasaun ba ema ne’ebé mate.
Puríssima no dulsíssima Virjen Maria, halo atu ita naran hori ohin ba oin sai kbiit ba ha’u moris. Na’i-Feto, keta kleur atu tulun ha’u bainhira ha’u invoka ita. Basá, iha tentasaun sira hotu ne’ebé asalta ha’u, iha nesesidade sira hotu ne’ebé ha’u hasoru, ha’u lakohi husik atu bolu ita hodi tulun ha’u, hodi repete nafatin: Maria! Maria! Nune’e mak ha’u hein atu halo durante moris, nune’e mak ha’u hein liuliu iha oras mate nian, atu ikusmai bá hahí ba nafatin iha lalehan ita-nia naran doben, oh klemente, oh piedoza, oh dose Virjen Maria».
