Liturjia Domingu XXVI Tempu Komún nian hatudu momoos katak, Maromak bolu mane no feto hotu atu empeña an iha konstrusaun mundu foun justisa no dame nian, ne’ebé Maromak mehi no hakarak propoin ba ema hotu. Iha Maromak nia proposta nia oin, ita bele asume atitude rua: dehan “sin” ba Maromak no kolabora ho Nia, eh hili dalan sira egoízmu nian, komodizmu nian, izolamentu nian no renunsia/para husi kompromisu ne’ebé Maromak husu mai ita. Maromak nia Liafuan ezorta ita ba kompromisu sériu no koerente ho Maromak – kompromisu ida ne’ebé signifika empeñu reál no ezijente iha konstrusaun mundu foun ida, justisa nian, fraternidade nian, dame nian.
Iha leitura dahuluk, profeta Ezequiel konvida israelita sira eziladu iha Babilónia atu kompromete an ho forma séria ho konsekuente ho Maromak, lahó argumentu oioin atu sees, lahodi halai, lahó pretestu. Fiar-na’in ida-idak tenke foti konxiénsia ba konsekuénsia sira ninia kompromisu ho Maromak no moris, ho koerénsia, implikasaun prátika sira ninia adezaun ba Jahwéh no ba Aliansa.
Evanjellu dehan oinsá konkretiza kompromisu ho Maromak… “Sin” ne’ebé Maromak husu mai ita la’ós deklarasaun teórika intensaun di’ak sira-nian, lahó implikasaun prátika sira; maibé kompromisu firme ida, koerente, sériu no ezijente ho Reinu, ho ninia valór sira, ho tatuir Jezús Kristu nian. Fiar-na’in ne’ebé loos la’ós ida ne’ebé “fó impresaun di’ak”, finje respeita regra sira no hatudu komportamentu loos tuir pontudevista konvensaun sosiál sira; maibé ida-ne’ebé kumpre iha realidade moris nian, Maromak nia vontade.
Leitura daruak aprezenta ba sarani sira Filipos nian (no sarani sira tempu no fatin hotu nian) Kristu nia ezemplu; maski nia Maromak nia Oan, Kristu la afirma ho arrogánsia no foti-an ninia kondisaun divina, maibé asume realidade frajilidade umana nian, hodi halo an servidór ema sira-nian atu hanorin ita lisaun boot liu domin nian, servisu nian, entrega totál moris nian tan domin. Sarani sira simu bolun husi Maromak atu tuir Jezús no moris hanesan nia iha entrega totál ba Aman no ba Ninia projetu sira.
