Iha loron 24 Setembru selebra “Nossa Senhora das Mercês” ka Na’i-Feto Laran-Sadia nian, ne’ebé signifika “mizerikórdia”, favór, tulun, devosaun ne’ebé hahú iha sékulu XIII, bainhira Virjen Maria mosu ba Saun São Pedro Nolasco no enkoraja nia atu la’o bá iha ninia empeñu atu liberta sarani sira ne’ebé ema halo sai atan.
Iha tempu ne’ebá, mouru sira (musulmanu) ataka no na’ok rejiaun sira iha tasi-ibun España nian no lori sarani sira nu’udar atan bá iha Áfrika. Iha kondisaun orrivel ida-ne’e, barak mak lakon fiar tanba hanoin katak Maromak abandona eh husik sira.
Pedro Nolasco, haree ba situasaun ida-ne’e, faan ninia patrimóniu eh rikusoin atu liberta dadur sira. Nune’e mós nia forma grupu ida atu organiza espedisaun sira no negosia resgate. Bainhira osan hotu ona, sira husu esmola. Maibé, la kleur tulun mós la iha ona.
Ida-ne’e halo atu Nolasco husu Maromak atu tulun nia. Nu’udar resposta, Na’i-Feto mosu ba nia no husu atu nia funda kongregasaun ida atu kasu/resgata dadur sira.
Nolasco husu ba Nia: “Oh Virjen Maria, Inan grasa nian, Inan mizerikórdia nian, sé mak bele fiar katak ita haruka ha’u?”
Maria hatán hodi dehan: “Ó keta duvida buat ida, basá Maromak nia vontade mak atu funda orden ida tipu ne’e nian ba ha’u-nia onra; sei sai orden ida iha-ne’ebé Irmaun no profesu sira, iha imitasaun ba ha’u-nia Oan Jezús Kristu, sei sai ema barak iha Israel nia ruina no salvasaun, katak, iha sarani sira nia leet, no sei sai sinál kontradisaun nian ba ema barak”.
Iha hakaran ne’e nia oin, nia harii tiha orden “Mercedários” iha 10 Agostu 1218 iha Barcelona, España. Saun Pedro Nolasco simu nomeasaun husi Papa Gregório IX nu’udar Superiór Jerál.
Sira ne’ebé hola parte, aleinde votu pobreza, kastidade no obediénsia, halo votu dahaat iha-ne’ebé sira kompromete an atu dedika sira-nia moris atu liberta atan sira no hela iha ema dadur nia fatin ne’ebé iha perigu atu lakon fiar, bainhira osan la to’o atu konsege liertasaun.
Iha tinan 1696, Papa Inocêncio XII fiksa loron 24 Setembru nu’udar Festa “Nossa Senhora das Mercês” iha Igreja tomak.
