Liturjia Domingu XXVII Tempu Komún nian utiliza imajen “Maromak nia to’os-uvas” atu ko’alia kona-ba Povu ne’ebé aseita dezafiu Maromak nia domin nian no serví Nia. Husi Povu ne’e, Maromak ezije fuan/produtu sira domin nian, justisa nian, bondade nian no mizerikórdia nian.
Iha leitura dahuluk, profeta Isaías haktuir Maromak nia domin no atensaun ba ninia “to’os-uvas”. Maibé domin ne’e labele tau nu’udar ekivalénsia fuan egoízmu nian no injustisa nian… Povu Jahwéh nian tenke husik nia an nakfilak ho Maromak nia domin ne’ebé fiél nafatin no prodús fuan di’ak sira ne’ebé Maromak apresia – justiza, direitu, respeitu ba ukun-fuan sira, fidelidade ba Aliansa.
Iha Evanjellu, Jezús foti fali imajen/ilas “to’os-uvas nian”. Nia kritika maka’as líder judaiku sira ne’ebé sai tiha na’in ba “Maromak nia to’os-uvas” hodi buka benefísiu ba an rasik no rekuza nafatin atu oferese ba Maromak uvas-fuan sira ne’ebé pertense ba Nia. Jezús fó sai katak sei hasai tiha “to’os-uvas” husi sira no sei entrega ba traballadór sira ne’ebé prodús no entrega fuan sira ne’ebé Maromak hein ba Nia.
Iha leitura daruak, Paulo ezorta sarani sira sidade grega Filipos nian – no ema hotu ne’ebé halo parte ba “Maromak nia to’os-uvas” – atu moris iha ksolok no hakmatek, hodi respeita buat ne’ebé loos, aas, justu no dignu. Ne’e mak fuan sira Maromak hein husi Ninia “to’os-uvas”.
