Enkontru FMA juniores zona Dili no Indonesia

Domingas da Silva FMA

Comoro, 18 de Marco de 2023

Enkontru daruak FMA juniores zona Dili no Indonesia nian, nafatin hala’o hamutuk ho madre Alma Castagna (Provincial Inspetoria TIN). Tema ba enkontru mak “SAI JENERATIVA IHA KOMUNIDADE” basá komunidade mak fatin ne’ebe ita halibur hamutuk tan Maromak nia Naran, atu haburas ita nia kapasidade sira, virtude sira no talentu sira hodi serbi Maromak liu husi ema seluk. Iha formasaun ida ne’e madre aprezenta ho detallu mai ami atitude sira ne’ebe presiza hakbi’it liutan iha moris komunidade mak hanesan: hakas-an konstante, sabedoria, dixiplina, konsentra-an iha buat hotu ne’ebe halo dadaun, pasiensia no kapasidade atu kontaktu ho ita nia an rasik no ema seluk. Tuir mai madre fo pergunta sira ba reflesaun pessoal no sharing iha grupu; Nu’udar grupu ami fahe esperiensia sira ne’ebe liu dadaun ona hodi deskobre mos atitude sira atu favorese komuniaun moris komunidade nian hanesan: Dialogu ne’ebe nakloke no sinsera, rona malu, apresia malu, sakrifisiu, servisu hamutuk, prezensa ativa no haraik-an. Enkontru remata ho Ave Maria ida hodi invoka Maria nia tulun tamba nia mak inan ba apostolu sira iha komunidade dahuluk iha kreda no ba umanidade tomak.